Ka Lok Sabha ynnin ka sngi da kyntait ko ya ka Constitution (One Hundred and Thirty-First Amendment) Bill, 2026 wow e bhah ya ki kynthai ha ki Election MP wa Election MLA hadien wym yoh ko ya i kyrchaan na kiwa boon.
Na ki 528 ngut ki MP, 298 ngut da pdiang ki ya ka katwa 230 ngut da pyrchah ki heiwa ka sorkar da emkaam ko wow yoh 352 Vote wow pdiang ya ka Bill.
Hawa pynbna yeini, u Speaker ka Lok Sabha, u Om Birla da ong u wa ka Bill ym em yoh ko ya i kyrchaan na kiwa boon.
Kani ka Constitution Amendment Bill emyatoh ko wa ka Women’s Reservation Act ya kawa tip leh kam ka Nari Shakti Vandan Adhiniyam heiwa da booh bhah wow em 33% ya ki kynthai ha ka Lok Sabha wa ki State Assembly wei lada jop ko da krehkaam ko pyn ha ki Election wow wan khlem da yang de ya ka Census wa thymme wei wow leh Delimination.
Neidaw wa rem kani ka Bill, da dam leh wow wanrah ya ar tylli kiwi kiwa yatoh wa kani hi, kitæ ka Delimitation Bill 2026 wa ka Union Territories Law (Amendment) Bill 2026.
U Kiren Rijiju uwa man kam u Montri ka sorkar pyrdi da ong u wa ini toh iwa sñiawsih neibhah waroh kini ki le tylli ki Bill toh kiwa yabilang wei ini da man ko leh wa chah pynrem ki kynthai kiwa man chiteiñ neiwa em bru hapoh ka ri.
Neiliang won kawa yahkhmat ka Congress, ka Priyanka Gandhi da ong ko wa ini toh i jop ya ka Liang Pyrchah wei u Rahul Gandhi won da ong u wa i thmu wow wanrah ya kini ki Bill man ko kamwa chah hiar thma ka Constitution ka ri tangwa da ye wow pynrem ka hapoh Lok Sabha.
U Home Minister ka ri, u Amit Shah won da ong u wa kini kiwa pyrchah ya kani ka Bill daw sñiaw ki yei chrai ki kynthai manda yaleh Election ki.
Discussion about this post