Ka Jaiñtia National Council (JNC) Central Executive Committee ynnin ka sngi hapoh i yahkhmat u President yong ka, u Sambormi Lyngdoh da yoh ko wow yachem wa u Wankit Pohshna, General Secretary ka Meghalaya BJP State Unit hadien i khut yong oo, wei ini i yachem wa kongsan da wan i hadien wa ka seiñ dadep ko u e dorkhat ha ka BJP ha ka 17 tarik u Wisu (Mar) 2026, heiyatoh wei eh i khoo wow tih mooyong ha Jaiñtia Hills wa ha jylla hi waroh kawi.
Hawa yaklam wa kiwa thoh khubor, u President ka JNC da ong u nadooh wa ka Supreme Court da e laad ko wow tih mooyong biang ha u snem 2019 deiwa ong wow tih katkam ki aiñ ka MMDR, ka JNC sñiawkhia joor ko wa kini ki kyndon ka MMDR ym yahaap ki tang kajiak leh wa i rukom man i thaw hapoh jylla yong i heiwa ym ye u bood ya ki kyndon.
Ka seiñ dadep ko leh wow pynman yei lai paidbah ha ka 7 tarik uni u bnai heiwa da em da ki hajar ngut kiwa tih mooyong kiwa da pynsñiaw yei dawa dei yatylli neibynta ka Policy tih mooyong kawa yatoh katkam i thaw i bhaw wa kyrpang yong i.
“Kam kiwa sumaar wa kiwa yakhun yei sur ki Jaiñtia ka seiñ daw pteiñ ko wow yasaaid neibynta u mooyong, uwa man i jakpoh hapoh Jaiñtia Hills. I yachem yong i wa u Wankit Pohshna da man i iwa sñiawkmen wa iwa em kyrmen, wei da kular u leh wow rah yeini chadooh ka sorkar pyrdi,” da pyntip u Sambormi.
Ka seiñ da ong ko hawa pait yei bichaar ka Supreme Court iwa ong wa ym ye u tih mooyong khlem ki kyndon ka MMDR, tangwa ka para 12A(b) yong ka Sixth Schedule da e bor ko ya ka President ka ri India wow pynlait ya ki aiñ ka sorkar pyrdi kam ka MMDR na i thaw wa pynkrehkaam ya ka. Wei lada ka sorkar pyrdi em ko yei mon wow pynlait ya ka MMDR na Meghalaya, ym em eh khamtam heiyatoh wa u mooyong khlem da kdaw ya kiwi ki mar pohkhyndaw.
I pyndam ka sorkar pyrdi ya ka Article 370 ka Kashmir, i pynlait ya ka CAA napoh Meghalaya, kini hi pynyoo che ko wa ym em eh ya ka sorkar pyrdi wow pynlait ya ka aiñ MMDR lada em ko yei mon khnang wow suk kiwa tih mooyong kiwa khian yong i, neibhah ka SOP wa katni kawa ong wa emkaam yei thaw wa heh 100 Hectare toh kawa eh neibhah hapoh Jaiñtia Hills kiwa boon hi kiwa tih mooyong toh kiwa em thaw wa khian, kamtæ kani ka 100 Hectare ym em man salonsar ko ya waroh, wei kayi kawa emkaam i kattæ toh wow pynlait ya kani ka MMDR nei krehkaam ko hapoh Meghalaya.
Heiyatoh won wa iwa ong u Montri Rangbah ka jylla u Conrad Sangma wa hawa ka sorkar pyrdi chna aiñ ko, chna ko ya waroh ki jylla, hao iwa sakhiat itæ, tangwa i ong yong oo wa ym ye wow e ya ka aiñ wa kyrpang ya ka Meghalaya neibhah kiwi leh daw paan ki, ini ym em yurim ko, neibhah waroh ki jylla ym em ki yaka Sixth Schedule, tangwa hapoh Meghalaya i em i, wei kani hi pynksan ko yei mantre yong i yei thaw yong i, yei marpoh khyndaw yong i.
Ka JNC e ko yei yaroh ya ka BJP Meghalaya wa da smat ko wow chimkhia ya kani ka kaam, wei da klam che leh ha u Wankit wa lada toh kawa ye wow yahlang waka seiñ wow yaklam waka sorkar pyrdi khnang wa kani hi ym man ko du i kwah yong kawon kawon ka Party, tangwa u man ko ka sur i dawa ki paidbah napoh Jaiñtia.
Neiliang ka seiñ da kyntait ko leh yei klam u Montri Rangbah neibhah i ong yong oo da yahbakla ko ya ki paidbah, neibhah hawa em i kyrmen ileh won u pyndooh yeini.
Kattæ ka dwar toh sa du haka sorkar pyrdi, wei kyrmen skem ka seiñ wa lyngba ka BJP Meghalaya u chimkhia ko yeini khnang wow yoh u khait ya u soh i jop.
“Wot ya ka Article 370 na Kashmir dang ye u pynlait, neitæ ya ka CAA na Meghalaya dang ye u pynlait, yei tih Mooyong leh ye hi u pynlait lada ka sorkar pyrdi em sakhiat ko yei mon saaiñ pyrthai namo ka Political Will”, pynkut u President ka JNC.
Discussion about this post