Hawa yoh u yaklam wa u Montri Rangbah ka jylla, u Conrad Sangma ynne ka sngi heiyatoh wa iwa da pynbna u ini wadep ha ka sngi Republic Day wa daw sdang e noh ya ki Mining License ha uni u snem kam chibynta i dap 50 snem ka jylla, da pynche u wa yow yoh Mining License em ki ar bynta nadooh wow paan bor chwa wow leh sorjamin (Survey) yow tip hadooh katwon em u mooyong wei hadien wa dep ini hap wow pynbiang ya ka Mining Plan yow yoh yei mynjur na ki chnat ka sorkar pyrdi yow sdang tih.
Da ong u yow leh ya ka sorjamin emkaam wow yoh chwa ya ka Prospecting License wei hadien wa dep wow leh ya ka sorjamin hap wow pynkreh ya ka Mining Plan kawa pynyoo kammon wow tih ya u mooyong kawa hap phah cha ki chnat ka sorkar pyrdi wa pait ya ini, wei hadien wa mynjur ya ka Mining Plan daw ye u sdang yei tih mooyong.
Da pyntip u leh wa da em 15-20 ngut ki bru samen kiwa da paan yow yoh ya ka Prospecting License wei da yoh ki leh ya kani wei hadien wa pyndep ya ka sorjamin hap leh wow pynbiang sa ka Mining Plan wei da yooluti u wa ha kini ki bnai wow wan daw em ki kattu katni ki Mining Plan kiwa daw yoh yei mynjur naka Indian Bureau of Mining (IBM) wa kiwi de ki chnat ka sorkar pydi yow ye yoo noh ya ka Scientific Mining hapoh ka jylla katkam ka hukum ka Supreme Court ha u Naiynñiaw 2019.
Hawa kylli ini iyi mut i kattu ya kiwa tih mooyong kiwa khian wa dai, neiliang u Conrad da ong u wa em hi i eh heiyatoh wa i rukom tih mooyong neibhah wym yoh de u tih kam nachwa neidaw wa ka sorkar India sñiawkhia ko yei chngaaiñ kiwa bru wa kreh ha ki paar mooyong kamtæ da phah wow leh da ka Scientific Mining.
Kamtæ da ong u wa nyngkong emkaam wow sdang chwa ya ini waroh wow yaleh yow yoh u tih mooyong wei da kyrmen u wa chisien wa sdang ini kitu kiwa khih mooyong wa khian daw ye ki u pynlang lang ya idæ deiwa krehlang yow pynheh yei kreh yow ye u yoh ya ka Mining Plan.
Chooh chooh da ong wa ha ki bynta wa le wa bood daw booddien waka sorkar India wa kammon wow e laad leh ya kitu kiwa khih mooyong dei khian, neibhah ym ye wow leh waroh ini chisien leh kamtæ da hap wow lai chakhmat kajiak chisien wei iwa emkaam toh wow pyntikna wa em kiwa yoh Mining License wei em leh ki Mining Plan kiwa da yoh yei mynjur.
Hadien ini daw lum lang ya kiwa boon hapoh kawi ka Mining Plan yow ye ki wow sdang tih deiwa ban joor u wa nyngkong emkaam wow yohbor chwa wow sdang biang yei tih mooyong hapoh ka jylla.
