U heh ka BJP uwa man leh kam u MLA ka Pynthorumkhrah, u AL Hek da pynsñiaw u wa boon kiwa em hapoh ka Party ha kylleiñ ka Meghalaya ym em de sñiawhun ki yei yahkhmat u State President uwa katni, u Ernest Mawrie.
Ini i ong u Hek toh hadien wa mih noh u Himalaya M Shangpliang napoh ka Party ynne uwa jooh man kam u MLA warim ka Mawsynram wei da thung ya oo leh kam uwa e ktien ka BJP heiwa ha ka chithi ieh kaam u da klam che u wa em i leh chilliang wa i yachah chilliang hapoh i yahkhmat u Ernest Mawrie.
U Hek hawa yaklam wa kiwa thoh khubor da ong u wa ini i pynbaad u Shangpliang ymtoh iwa baka wei kiwa boon hapoh ka Party leh sñiaw ki kamjooh hi neibhah i rukom krehkaam toh iwa ktah bha yei heh i san ka Party ha Meghalaya.
Hawa kylli won ileh ym em i dawa wow thung noh da uwi u President, u Hek da ong u wa i por u Ernest da jan poi i cha wakut wei kiwa yahkhmat ka Party ha Delhi dang boonkaam ki wow pynkhreh ya ki Election kiwa daw pynman ha kiwa boon ki jylla. Da pyntikna u wa daw leh ki yeiwa toh u leh ki hadien wa kut ka Election.
Chooh u Hek da pyntip u wa ka Party daw khut ko yaka yalang wa jhan deiwa emlang waroh ki dkhot yow yaklam yeini wa da pynbaad u Shangpliang uwa da ong wa i rukom krehkaam ka BJP hapoh u President wa katni daw ktah ko yei heh i san ka Party hapoh ka jylla neidaw wa joor la leh chilliang.
Discussion about this post