Ka National Spokesperson yong ka All India Congress Committee (AICC), ka Babeeta Sharma da ong ko wa Congress daw pyrkhat bha ko hawa yatoh wa ki MLA wa kiwa yahkhmat kiwa da mih noh na ka Party kiwa kwah wow uiñ biang.
Da ong ko wa ka Party ka pdiang ko ya kiwa kwah wow uiñ biang wei daw pynlait leh ya kiwa kwah wow mih lada ym yahaap ki wa ka Party, tangwa da ong ko wa ka Congress toh du ka kawa yieñ neibynta waroh wei klam ko neibynta waroh khlem da pynyaphær ya ka jait næ iwa ngait ki bru.
Hawa yatoh wa i pynkhlan biang ya ka seiñ ha kani ka jylla, da ong ko wa ka Congress hapoh i yahkhmat yong u President ka MPCC, u Vincent H Pala, ka Congress da em ko yei kyrmen wow wan biang hei bor.
Da ong ko wa lada kreh chitom, ki paidbah daw e biang ki yei chaniah ha ka Congress ha kani ka jylla, wei da pynrap wa ka Congress da leh chiboon kiyi kiyi neibynta ka Meghalaya, neibhah wa toh ka Congress kawa da pynyoh ya ka jylla, wei ka Party ka em ko yei yajan wa kyrpang wa ka jylla Meghalaya, kamjooh wa ki paidbah ri-loom ka thaaiñ mihsngi.
Ka Babeeta da ong ko wa kopsar ki paidbah da mylliñ ki iyi wa ka Congress da leh ko neibynta ka jylla, boi daw hap wow pynkynmoo biang ya ki paidbah ya ki kaam wa ka Congress da leh ko neibynta kani ka jylla ha ki snem wa da dep.
