Ha ka kyrwoh wa da phah da u President ka Voice of the People Party (VPP), u Ardent M Basaiawmoit da ong wa ka jylla Meghalaya em ko kattæ hei duna poisa hadooh wym dap poisa wow pynkrehkaam yeiwa emkaam tangwa da pteiñ wow thung wakreh wow pynlai ya ka sorkar.
Da ong wa da yoo lakam wym sñiawthooh iyi mut manda lai chong ngiah ki sahep sorkar hapoh ka jylla, hanla da mih i pyrchah na kiwa boon kamjooh kiwa sikai wa kiwi ki wakreh ki wym yoh ya ka tulop ki da boon bnai, tangwa ka sorkar ym bien ko wow pynbait yei luti yong ki.
Da e nongmuna yei dang dep thung ka sorkar jylla ya u Director General of Police warim ka jylla uwa dang dep chong ngiah deiwa thung ya oo kam u Security Adviser deiwa su tulop T. 75,000 chi bnai najrong kiwi de ki myntoi.
Da kylli yeiyi i daw wa kiwi Party ri-loom kiwa em hapoh ka sorkar kiwa da jooh klam chaphang iwa emkaam ki bru ka jylla tangwa heiyatoh wa ini da suki hi-eh ki. Wei da yoo wa kani ka sorkar katni toh kawa boon dooh ki bru leh wa da thung kam kiwa e buit.
Da kdaw wa da em 5 ngut kiwa e buit du ya u Montri Rangbah samen wei iyi i daw wa emkaam u hadooh katni ngut kiwa e buit, wei ini da pynyoo wa ka sorkar ym em chakri ko neibynta ki paidbah tangwa du ya kiwa kyrchaan yong ki.
U Ardent da ong u leh ini i thung ya u DGP ye u man kamwa leh sñiawbha ya oo wa em ki kaam wa bha wa da leh u wei ki paidbah kwah ki u tip kiyi kini i kaam wa leh u hadooh wa sah ram ka jylla ha oo? Boi wa man u kam ka kor wa pynemkaam ki bru wa em hei bor? Ym toh ini wa man pyrchah yei kaamram ki sahep sorkar deiwa tuklar ya ki kaam yong ki?
Kamtæ u Ardent da ong u wa da yooluti wa daw poi i por wa ki paidbah ka jylla u e ki yei jubab wa biang cha kitu kiwa joor palat khlan bor wym toh u ye ki u leh katwa ngait khlem em wa yieñ pyrchah. Heijooh i por da ong u wa ym yooluti wa ka sorkar wa synchaar u wanrah ko yei kylla tangwa ini toh i pynkynmoo cha ki paidbah yei pynlut phut wa da jia hapoh kani ka sorkar wa katni.
