15 49.0138 8.38624 1 0 4000 1 https://wyrta.com 300 0

Krehkaam pura ka khang chnong wa khut da ka NESO ha Meghalaya

0 Comments
Advertisement ad1

Shillong: Ka khang chnong wa 11 kynta wa khot da ka North East Student Organisation (NESO) wow pyrchah yei man aiñ ya ka Citizenship Amendment Bill, 2019, da krehkaam pura ko ha ka jylla Meghalaya wa kynthup lang wa ka thaaiñ mihsngi waroh kawi yong ka ri India.

Ha jylla Meghalaya i khang chnong yong ka NESO da lai bait ko da i ksohkti lang ki paidbah yong ka jylla waroh kawi wei da sakhi yei thylli ki sarok, ki yung krehkaam sorkar wei kamjooh ki yaw ki haat man ki kiwa khang ha waroh kawi ka jylla Meghalaya ha ki kynta khang chnong.

Advertisement ad1

Ha ki kynta khang chnong hanlada ym em iwon iwon i jia wa ktah ya ka suk ka saiñ, tangwa da sakhi yei thang yaki tyre kari ha kiwa boon ki sarok kylleiñ ka jylla wa i khang ya ki sarok da ki moo kiwa heh.

I thang ya ki tyre kari da jia ha sor Shillong wa khapsor, ha ri-loom Jaiñtia, South West Khasi Hills District, West Khasi Hills District wa Ri-Bhoi District.

Ha nongbah Shillong da sakhi yei thylli ki sarok neibhah ym em ki kari kiwa lai laitnoh 1-2 tylli ki kari paidbah, ki kari Hospital wa Ambulance.

Neiliang yong ki pulit da lai sonteri ki ha kylleiñ yong ka Shillong yow pait wa ym em iwon iwon i jia kawa wanrah ya i sñiawsih.

Ha i por step wa sdang kani ka khang chnong da em i chah thang kawi ka Gypsy kawa man ka kari pulit kawa em ya u number ML-02-5052 ha Mawlai Nongmali hajan ka kudam FCI heiwa kani ka kari pulit da iñ lut ko.

Da yoh yutip leh wa ha ki kynta khang chnong da em i chah kawang moo ki kari wa em kamwa 19 tylli ha ka thaaiñ Laban wa ha kiwi ki bynta ka sor Shillong, tangwa kini ki kari da chah ktah ki malu mala na i piah yong ki yit wei ym pu em yutip wa lada em i chah ktah wa joor.

Da yoh yutip leh wa ha ki kynta khang chnong, ki dkhot ka seiñ KSU da beh noh ki ya ki kattu katni ngut ki wakreh sorkar kiwa thmu wow lai kreh ha Shillong wa ha ki bynta ka East Jaiñtia Hills wa South West Khasi Hills.

Ye wow ong wa ini i khang chnong wa khut da ka NESO da krehkaam pura ko neibhah ki yungkrehkaam ka sorkar wa ki thaw krehkaam yong ki Company ki bru samen da lyngam ki kiaw kiaw, tangwa hadooh wa pynmih yaka khubor ym pu yoh yutip wa hadooh katwon em ki wakreh sorkar wa lai kreh.

Ki dkhot yong ka Khasi Students’ Union (KSU) Laban Circle ynne ka sngi da lai ki wow kbai pynrem ya ka sorkar India wa yahkhmat da ka BJP hakhmat yung u MLA ka South Shillong, u Sanbor Shullai uwa man leh u MLA ka BJP.

Ki dkhot ka KSU da kbai pynrem ki ya u montri kaam pohyung, u Amit Shah, ya u montri rangbahdooh ka ri, u Narendra Modi wa yaka BJP wei kamjooh leh kbai pyrchah ya ka CAB.

Advertisement ad1

0 Comments

Leave a Reply