Shillong: Ka NPP kawa yahkhmat yaka sorkar MDA hapoh ka jylla kawa pyrchah joor bha yaka Citizenship Amendment Bill, ynne ka sngi da kylla ko yei yieñ yong ka deiwa kam wa ka sorkar pyrdi da leh ko ya iwa boon yow pynbait yei pyrchah ka jylla yaka CAB.
Hawa yaklam wa kiwa pathai khubor hadien wa kut ka yalang ki montri wa da khut jhan ynne ka sngi, u montri rangbah, u Conrad Sangma da ong u wa ka sorkar nachwa da khuslai ko yei psiah tooh kiwa boon chapoh ka Meghalaya lyngba ka CAB, tangwa hadien wa da pynbna wa em kiwa da pynkylla hapoh ka Bill, da pynche daka Union Home Ministry wa ka tarik wa khadooh katkam ka CAB toh ka 31-12-14 wow kheiñ tre ri ya kiwa da em chwa wei ini pynyoo wa neini chakhmat ym chah wei ym ktah de ko yaka jaitbru ka thaaiñ.
“I tieñ ki paidbah wa daw pteiñ hi wow em ki wow psiah cha kani ka thaaiñ ym toh de u em ki neibhah da booh yaka tarik wa khaddooh wa chwa u kut u snem 2014 hapoh ka Bill,” da ong u Conrad.
Da ong u leh waka sorkar pyrdi da booh ko ya kiwa boon ki kyndon hapoh ka Bill wa ym krehkaam ko haki jylla wa em ka ILP waka Sixth Schedule, da pynrap u deiwa ong leh wa lada em kiwa yaleh yow yoh man tre ri daw hap ki wow yoh mynjur chwa naka sorkar jylla.
Katkam i ong u Conrad wa hadien wa booh ya kini ki kyndon hapoh ka Bill, ka sorkar sñiaw ko wa waroh ki khuslai da dep leh ka sorkar deiwa pyrkhat wow yada ya kiwa boon ki thaaiñ North East.
“Kamtæ i sñiaw i wa ka sorkar da leh ko yei bynta yong ka wei hajrong ini, ka Agatha Sangma leh da kyrchaan ko ya kani ka Bill,” pynche u Conrad.
Heijooh i por da ong u wa i yakhih ki jylla ka North East wa kyntup yaka jylla dang pteiñ hi ki wei ka sorkar jylla daw yachem ko wa u Lat ka jylla yow e noh u yaka muhor yaka Meghalaya Residents Safety and Security Act.
Chooh chooh da ong u wa ka Cabinet da rai ko leh wow yachem ya u Union Home Minister yow kyntu ya oo yow booh chooh chooh u ya ki laad ki luti kam ka ILP wa kiwi yow e yada wa rap khlan yaki jaitbru ri-loom ka jylla.
Hawa kylli wa lada ka sorkar jylla da kylla ktien ko, da ong u wa ini ym toh i kylla ktien wei ka sorkar daw yaklam ko wow pynkrehkaam yaka ILP wei wow pyllait yaka jylla Meghalaya waroh kawi naka CAB manda yachem ki wa u Union Home Minister ha kini ki sngi.
Hawa kylli, da jubab u wym em leh 2-3 tylli ki manyung wow wan cha Meghalaya hadien wa pynkrehkaam yaka CAB.
Da kyntu u leh yaki paidbah yow pait bniah ki ya iwa da leh ka sorkar India yow pynbiang ya iwa dawa ka jylla heiyatoh waka CAB.
Hawa kylli won yeiwa chah tympiah tympra ha Shillong naka khang chnong wa khut daka NESO ynne ka sngi, u Conrad da ong u wa ki chnat sorkar wa toh u pait ya ini daw leh ki katkam ki kyndon ka aiñ deiwa pynrap ini wa jia toh iwa ktah pyn ya ki bru yong i.
Discussion about this post