Shillong: Ka seiñ saiñpyrthai People’s Democratic Front (PDF), kawa kyrchaan ya ka sorkar jylla Meghalaya Democratic Alliance kawa yahkhmat da ka National People’s Party (NPP) wa u Conrad K Sangma kam u Montri Rangbah, da ong ko wa chong ha i stat u Montri Rangbah wow kdoh u khoom ya i pynbaad khayi mooyong pyrchah yaka aiñ lada toh iwa man sakhiat.
Da ong wa neiliang ka Party da jooh yaklam ko ya kani ka phang wa u Montri Rangbah, heiwa neiliang u President ka Party, u Banteidor Lyngdoh uwa man leh u Montri ha ka sorkar jylla, da ong u, “I ym sñiaw yahap i yaka khayi mooyong wa pyrchah yaka aiñ. Lada toh kiwa em chalan næ kiwa biang ki kot ki sla katkam ki kyndon khayi mooyong, i ym em me i iyi iyi i eh neibhah ka sorkar jylla yoh ko yei pynmih poisa”.
“Neiliang u Montri Rangbah da jooh klam u ya ini wei nga tharai O wa kam uwa toh u pait ya ka chnat hi, tip u rap bha wa hap u wow pait bniah kayi kawa toh wa kayi kawa lait”, da ong u. Ha kawi won ka liang da ong u wa hap wow chem yei sakhiat la em næ ym em ka khayi mooyong pyrchah yaka aiñ. “Hap wow em i pynsakhiat iwa biang”, da ong chooh chooh u.
“I da yaklam i wei chong ha i stat u Montri Rangbah wow pait ya kani ka kaam. Lada emkaam ka ya syllok lang i man i kiwa smat”, da ong u. “Hawa em i pynbaad ya ka sorkar, i leh em i ha ka sorkar, wei ktah ko wow chah pynbaad lang tangwa i ym tip iyi iyi leh ya kani ka bynta pynbaad khayi mooyong pyrchah yaka aiñ”, da ong u Banteidor.
Hajrong i mih i pynbaad ya u James Sangma u Montri sorkar wa emkti u wow khayi mooyong pyrchah yaka aiñ, neiliang u Banteidor da ong u, “I da yoo i yei pynbaad ha ki Social Media wei ym tip i lada toh kawa sakhiat næ kawa ym toh wei i da pynsñiaw i cha u Montri Rangbah hajrong ini i bynta neibhah wa da mih ki pynbaad kiwa na i por cha i por”.