Ka NPP kawa jop 26 ngut ki MLA ha ka Election 2023, da ku syndon chadooh 31 ngut i em ki MLA ha ka yung dorbar kawa 60 ngut hadien chi snem tam.
Mar ya kut ka Election hadien kattu katni bnai, ka NPP da yoh ko sa ar ngut ki MLA hadien wa wan psiah kiwa na ka PDF wei ynne won hadien chi snem tam, da ku cha ka 31 ngut hadien wa da wan psiah sa le ngut ki MLA na ka Congress.
Ini i yoh ya ki MLA kiwa da jop chwa mut i wa ka NPP da ye ko wow yahkhmat ya ka sorkar samen ha ka yung wa em 60 ngut ki MLA.
Hawa klam ha ka yalang pdiang burom ya ki 3 ngut ki MLA ka Congress ynne ka sngi, u Prestone Tynsong uwa man u President ka NPP Meghalaya, da ong u wa i wan psiah ki 3 ngut ki MLA ka Congress toh i kyrkhu kawa na cha kylla yong uwa seiñ ya ka NPP, u Purno A Sangma (baam kwai ha dwar u Blai).
U Prestone da ong u wym jooh yooluti u wa ka NPP u poi ko chadooh katni i boon ki MLA deiwa em em 31 ngut kattæ wot hadien wa tyngkooh ha kiwa boon ki moochynthut.
Da kynthah u ya u President ka MPCC, u Vincent H Pala uwa da ong wa ka Congress ye ko wow lai cha ka Supreme Court yow khang laad deiwa kam wa thied ka NPP ya ki MLA. U Prestone da ong u wa ka NPP ym tieñ ko wow yakhun ha Supreme Court leh lada kwah u wow leh kamtæ.
Discussion about this post