Ka JAC Ri-loom Jaiñtia hadien wa da yoh ya ka ujor wa boon na kiwa chong chnong khamtam kiwa kjut wa chitom wa tkoh ware i rukom krehkaam ki thaw sumaar kam ki CHC, PHC wa ki Sub-Center ha waroh kawi ka Ri-loom Jaiñtia kamtæ ka JAC daw lai pait lai sylli ko ya ki thaw sumaar wow leh yeiwa emkaam.
Chooh chooh ka JAC da ban joor ko wa hajrong i ku ware ka bai sumaar ha ki Hospital waphær waphær da ktah bha i ya kiwa duna hei yoh i la khamtam kiwa chah ktah ha u COVID-19 heiwa ka bai sumaar da poi ko da ki lak tyngka.
Hajrong ini ka JAC daw lai yachem ko leh ya ki bor wa pait wow chem yeiwa sakhiat khamtam hajrong i pynemkaam ya ka MHIS hawa chah ktah ha u COVID-19 wei da kylli ko leh ya ki thaw sumaar ki bru samen namo ki Private Hospital lada bood ki ya ki kyndon wa da booh ka sorkar.
Chooh chooh ka JAC da sñiawkhia ko leh hajrong i wym em ki X-Ray, ki kor leh Scanning wa ki dawai ha ki thaw sumaar sorkar hapoh Ri-loom Jaiñtia kamjooh i phah leh ya ki Test waphær waphær cha ki Clinic wa ki Hospital ki bru samen iwa ktah joor ya ki paidbah.
Ka JAC da kylli ko neiyi i daw wa ymye ka sorkar u pynbiang yeiwa emkaam ki thaw sumaar yong ka? Hajrong ini ka JAC daw yachem ko ya ki heh wa pait ya kini ki thaw sumaar khnang wow tip yeiwa sakhiat.