Jowai: Kam chibynta wow pynwiar yei tieñ kiwa thap Vote ha Nagaland wa daw wan hiar ka Hindutva hapoh ka jylla Nagaland, ka BJP da pynmih ko da ka kular wow phah mynkna ya ki Kristan cha Jerusalem lada poi ko heibor.
Ka Congress won kawa da kwah wow mihkhlieh biang ha Nagaland da tyrwa ko wow phah ya ki hei dor wa duna lada poi ko hei bor katwa ka BJP won da ong ko wow phah ya kiwa da heh rta cha Jerusalem.
Uwa e ktien ka BJP ha Nagaland u James Vizo da pyntip u wa ya kiwa da heh rta ye u man ka bai lai ki kawa mynkna katwa ka Congress won da ong ko wa daw pynmih ko da ka aiñ jylla wow yarap ya ki u lai cha Jerusalem.
Da suba wa da mih kini ki tyrwa hadien waka Nagaland Baptist Church Council (NBCC) da maham ko ya ki paidbah pyrchah ya ki bor ka Hindutva wei da thoh ko leh cha ki heh seiñ saiñhima chaphang ini khamtam iwa chah lehbeiñ kiwa khian paaid nadooh 2015 hadooh 2017.
Ka NBCC da ong ko leh wa ym ye u len wa i yakhih neibynta ka Hindutva hapoh ka ri India dang khlan i ha kini ki snem lyngba ka RSS hadien wa wan ka BJP heibor.
Discussion about this post