Ki dkhot kynthai ka Congress wa kynthup ya ka Bonbeeta Sharma, AICC Media Coordinator, ka Joplin Scott Shylla, President Meghalaya Pradesh Mahila Congress, ka kyrtong na Khliehriat, ka Jhanika Siangshai wa kiwi de, ynne hawa yaklam wa kiwa thoh khubor ha Shillong, da ong ki wa ka Congress toh kawa yieñ leh neibynta ki kynthai.
Da ong ki wa ki kynthai man ki kam u chrot ka synchaar paidbah wa ka roi ka paar wei kwah ki wow wai ki laad ya ki kynthai yow man ki kiwa ye u yieñ hei kjet yong ki hi khamtam ha ki kaam kamai kajih.
Da pynsñiaw ki leh yei sarong wa ki kynthai ka Meghalaya em ki ka bynta wa kordor ha ka imlang sahlang katkam ka dustur riti wa e kur e jait cha ki kynthai wei ki kynthai ka Meghalaya da tip ya ki kam kiwa kreh chitom bha tangwa dang em ki chiboon wow lai luti yow man ki kiwa da laitlooid ha ka kaam poisa poilaiñ. Kamtæ da ong u wa ka Congress toh kawa sñiawthooh yeiwa emkaam ki kynthai wei u kreh yow pynman ya ini i kaam iwa jop.
Hajrong ini, ka Congress da kular ko wow e yei sumaar wa mynkna cha waroh kiwa chong chnong wei daw pynbna leh ya ka Free Health Care Scheme.
Daw e leh yei sikai kammon wow seiñ khih ya ki kynthai wei daw e yarap poisa leh T. 3000 chi bnai cha ki kynthai wa psa khon samen kiwa wan na ki manyung wa dooh wa duk.
Heiyatoh wa i puræ puthi ya ki kynthai, da kular wa daw e dei mynkna nadooh Kindergarten hadooh Class XII.
Ya ki manyung wa dooh wa duk daw e ya ki tin yung wa miat bha wei ya ka bordiñ leh daw e mynkna 200 Unit.
Daw e mynkna leh kawi ka tadong LPG man ka 3 bnai cha ki manyung wa dooh wa duk.
Daw sdang leh ya ki yaaw ki haat du neibynta ki kynthai wow dai du ya ki mar wa da chna hapoh Meghalaya.
Da kular leh wow sdang ya ka chnat pulit kawa tip kam ka Special Urban Police Force kawa em ki tiar ki tar katkam ka juk kawa katni yow pait ya ki kaam pyrchah aiñ ha ki thaw wa em cha sor wei daw pynku leh yei bhah (Reservation) neibynta ki kynthai ha ki kaam pulit.
Da e nong muna leh wa ka Congress Party toh kawa pynchlur ya ki kynthai ha ki kaam Politics heiwa em ki ki kynthai wa man MLA, kiwa man Montri sorkar, ki MP wa kiwa man dkhot ha ka National Women’s Commission kiwa na Meghalaya.
Da kdaw leh wa ha uni u snem ka Congress Party da pynyieñ ko 10 ngut ki kyrtong kynthai ki wow yaleh MLA heiwa kawa dang khian rta dooh toh kawa 28 snem ka Jhanika Siangshai kawa da dep puræ MA (English), MA (Tourism).
