Ki bor District ka East Jaiñtia Hills District ynne da pynman ki ya i pynkupburom ya kiwa sikai Class 8, 9 wa 10 hapoh ka thong krehkaam “Ka Lawei” ha Auditorium Hall ka Don Bosco College, Byndihati, heiwa u Montri ka chnat puræ puthi ka jylla, u Rakkam A. Sangma, da man u kam u kongsan katwa ka MLA ka Sutnga-Saipung, ka Santa Mary Shylla da wan ko kam ka symbood kongsan hei emlang u H.M. Shangpliang, Advisor ka chnat puræ puthi uwa da man kam uwa chah khut sñiawbha.
Ka “Ka Lawei Project” toh ka thong krehkaam wa sdang da ki bor District wow pynku ya i puræ puthi deiwa pynemkaam ya ki tiar stat ka juk wa katni namo ka Digital Learning khamtam ha ki chnong wa em cha palatsor wei da booh leh ya ki Digital Smart Classroom ha ki 50 tylli ki skur ka District.
U Rakkam A. Sangma, da ong u wa i stat i tip toh iwa kongsan bha wow pynkhlan ya ka imlang sahlang ka jylla wa ka ri.
Da ong u wa ka Lawei Project toh yow pynkhlan ya i stat i tip wa i puræ puthi deiwa pynchlur ya kiwa sikai wow pynku ya i rukom hikai yong ki neibynta i bha i miat ki khynnah. Da ong u leh wa ka jylla hapoh i yahkhmat u Montri Rangbah da kreh chitom u wow pynku ya i stat i tip wow yaryngkat wa kiwi ki jylla ka ri.
Ka Santa Mary Shylla, da kyntu ko ya kiwa sikai wow chakri hok wow e yei stat i tip wa paka ya ki khynnah deiwa yaroh ya ki bor District hapoh i yahkhmat u Deputy Commissioner wa da pynkrehkaam ya “Ka Lawei Project”, ka wow pynjanai ya i rukom e sikai ya ki khynnah.
Chooh chooh da pynbna ko wa na ka Special Rural Works Programme (SRWP) daw e ko T. 10 lak cha ki skur ka District wow thied ya ki ya ki tiar pynneh bordiñ (Backup Power Systems) khnang wym thut i rukom sikai ya ki khynnah.
Neiliang u H.M. Shangpliang, da ngait skem u wa “Ka Lawei Project” daw yarap ko ya ki khynnah ha ka District wei da yooluti u wa daw pynkrehkaam ha kiwa boon ki skur wei da kular u leh yei yarap na ka sorkar wow pyntikna wa yoh myntoi ki khynnah na kini ki Smart Classroom. Da ong u leh wa ka sorkar u chimkhia ko wow pynjanai yei rukom e sikai wei ka sorkar da sdang ko wow lai chakhmat heiyatoh wa ini chi kaap chisien.
Kiwi kiwa klam kynthup ki ya u Deputy Commissioner ka District, u A. Baranwal, u G. Warjri, Addl. Deputy Commissioner, P. Dkhar, District School Education Officer wa u Father. George. Lyngkhoi, Principal Don Bosco College, Byndihati.
Ha kani ka sngi da e sñiawbha da ki tiar sahkynmoo cha ki 9 ngut kiwa sikai Mathematics, Science wa Social Science ha ki Class 8, 9, wa 10.
Da saam leh ya ka Award cha ki le tylli ki skur kiwa da pynkreh bha ya “Ka Lawei Project” wei da pynyoo ya ka phlim wa tbian yei pynkrehkaam ya kani ka Project kamjooh leh u Montri da jngieh u ya ki Smart Digital Classroom ka Byndihati Secondary School, Byndihati.
Hadien ini u Montri da yachem u wa ki sahep ka chnat puræ puthi wei da yaklam u leh wa kiwa sikai Primary School ka District.
Discussion about this post