Kular ka sorkar wow pynku yaka poisa kiwa sikai, lada pteiñ ka yakhih kopsar em iyi iyi cha kylla: Prestone

U Symbood Montri Rangbah ka jylla, u Prestone Tynsong da khana u wa da klam che cha kiwa yahkhmat ka Federation of All School Teachers of Meghalaya (FASTOM), wa ka sorkar daw pynku bait ko ya ka yarap poisa cha ki skur (Aided School), wei ya kani ka rai daw chim ha ka yalang yong ki Montri namo ka Cabinet kawa daw man ha kini ki sngi wow wan.

U Prestone da ong u wa lada ki dang pteiñ biang ki wow yakhih, ieh wow bichaar noh ki paidbah ka jylla neibhah ym toh de ka phang (Agenda) du wow pynku ya ka yarap poisa iwa mut em kiwi de ki Agenda wym tip.

Da ong u wa katkam i sñiawthooh yong oo, da toh i por ya kiwa yahkhmat ka FASTOM wow pynche ya kiwa sikai waroh wow dam noh yei yakhih wei wow yang hadooh ka sngi wow chim rai da ka sorkar, wei ka sorkar daw chim ko yei rai neibynta i bha i biang kiwa sikai wa ki skur wa toh ki u yarap.

Hadien ka yakhih deiwa ya chong sahmiet yong kiwa sikai skur Adhoc, u Prestone Tynsong da khut u wow yaklam wa kiwa yahkhmat ka FASTOM wow khana yei lai i kaam heiyatoh wow pynku yei yarap poisa cha ki ‘Aided School’.

Related posts

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Phah u Himanta wow tyngkheiñ yei kjat kiwa yaroh ya ka Pakistan

May 2, 2025

U Symbood Montri Rangbah da kyrpaad ya kiwa sikai wow sñiawbha wow dam noh yei yakhih wei lai noh cha yung, wei lada i rai yong ka sorkar man ko da kamwi won ye ki wow pteiñ biang ya ka yakhih ka yong ki.

Da ong u wa ka sorkar chisien wa da leh, toh u man iwa janai, nadooh i yukheiñ yukdiah deiwa pynrap wa lada poi du kajiak ha ka chi snem daw man ko kawa rap suk, tangwa iwa emkaam toh wow pynlut kamwa T. 200 klur. Da ong u wa ym toh wow pait du ya ki ‘Aided School’ neibhah em sa kiwi kiwi leh ki skur ya kiwa hap wow pyrkhat na ka timun tidiang, wa nakhmat nadien.

Ha iwi i liang, u Symbood Montri Rangbah da ong u wa ki ‘Aided School’ namo ki skur kiwa ka sorkar ka e yarap ko toh kiwa pynlai wei mantre da ki kynhun kam ki Balang, ki chnong wa kiwi kiwi wei ki tip ki leh wa i pynlai ya ki skur toh da ka Managing Committee, neibhah wot ya kiwa sikai leh ym toh kiwa thung da ka sorkar, tangwa da thung da ki Managing Committee wei ki Managing Committee toh u chim ki ya waroh i kitkhlieh kammon wow pynbiang ya kiwa sikai, neibhah ka sorkar da jooh phah bait ko du ka poisa yarap man-u-bnai cha kini ki skur.