Kiwa yahkhmat ka Meghalaya ASHA Workers Union (MAWU), ynne sngi hadien wa yachem ki ya u Montri ka chnat i chait i khiah, u James P.K. Sangma, da pynsñiaw ki yei wym hun neibhah i yaklam ym em u poi i kat chawa em leh.
Hawa yaklam wa kini kiwa yahkhmat ka seiñ ki ASHA, da ong ki wa ynne ka sngi hadien wa da pynman ki ya ka Rally, ka sorkar da khut yaklam ko ya ki heiwa da yaklam ya ki mat kiwa boon.
Neibynta i dawa wow pynku noh ya ka nong na ka T. 66 cha ka T.300 chi sngi, ka sorkar da paan por ko wow pait bniah hajrong ka mang tangka hadooh u Naiynru 2022, wei kamtæ hanla neiliang ki ASHA ym hun ki tangwa da hap e por ki ya ka sorkar kamwa da kular ko wow pyndep ya ini i kaam wei heiyatoh wa i kjut i chitom kiwa kreh ASHA, u yoh ki ya i sumaar mynkna lyngba ka MHIS Card.
Heiyatoh wa i su wa toh wow yoh, ka sorkar da pyntip ko wa daw pynlait noh ko ya ka ha u bnai wow wan ha u Naitung (Apr).
Chooh chooh da pynsñiaw ki yei em hi i hun wa ka sorkar da elaad ko ya ki hanla ympu hun ki, wei da yoh ki wow lai yaklam wei da ong ki wa lada i mynjur ka sorkar ym pynhun i ya ki, ym yohsa ki wow mih biang cha sarok.
Kam wow pynkynmoo, ki wakreh ASHA ha kylleiñ ka jylla, da dawa ki neibynta wow pynku ya ka nongsngi na ka T. 66 cha ka T. 300 chi sngi wei wow pynlait noh ya ki tulop ki wakreh ASHA ha waroh kawi ka jylla iwa da sah nadooh u snem 2020.
Puræ leh: Da ki hajar mih ki ASHA yow dawa yei nong, maham sah miet ha Secretariat
