Jowai: U montri rangbah ka jylla ynnin ka 26 tarik da lai pait u yei kreh wa sahteiñ yong ka Rymbai Water Supply Project kawa da mang neibynta kiwa chong chnong ka Rymbai wa kiwi kiwi ki chnong ka East Jaiñtia Hills.
Kani ka Project manda dep chna ya ka u saam um dih ko ya ki 10,000 tam ngut ki bru tangwa man ko kawa sahteiñ wow pyndep ya ka hadooh kini ki sngi.
Ka thaw kawa da chna ya kani ka thaw saam um toh em ko ha Phe Phe ha i khloo wa em hajan ka chnong Rymbai wei neini daw phah (pump) ya ka um cha i thaw wa em rap hajrong dep neitæ yow saam won ya ka um cha ki yung bru.
Ha kani ka sngi ya u Conrad Sangma da synraan da u montri ka tnat Revenue and Disaster Management, uwa man leh u MLA ka thaiñ, u Kyrmen Shylla hei emlang ki heh ka District wa ki heh yong ka tnat PHE.
Heiyatoh wa ini, u Conrad da ong u wa em boon tylli ki Scheme kiwa sah kam ka Jowai Water Supply Scheme, wa kiwi kiwi wei ini i sah ki toh neipor ka sorkar warim.
Da ong u wa neiliang ka sorkar MDA wa katni u thooh ko ya ki laad wa kammon wow pyndep noh wow chna ya kini ki scheme khnang wow myntoi ki paidbah ka thaiñ.
Discussion about this post