Ka District Executive Committee yong ka National People’s Party (NPP) West Jaiñtia Hills ynne da lai yachem ko ya u Montri Rangbha ka jylla, u Conrad K Sangma hajrong ki kaam wa sahteiñ hapoh ka Ri-loom Jaiñtia.
Kini ki mat ki kynthup ki nadooh ka Iawmusiang Market Complex kawa da sahteiñ da ki phaw snem, kawa ar wow pynlait noh ya ka tulop kiwa kreh ka JHADC wa ka bhah poisa yong ka Council i wow pynsuk ya ka Council hei wow su tulop man-u-bnai khnang wym thut i rukom su tulop.
Ha ini i lai yachem ka Committee ya u Montri Rangbah da yahkhmat da u MLA ka 2-Jowai u Wailadmiki Shylla, u CEM ka JHADC, u Thombor Shiwat wa kiwi kiwi.
Ha ini i lai yachem, ki dkhot ka Committee da yoh laad ki wow phyllu yumut bha hajrong kitai ki kaam kiwa hakhmat dooh neibynta i myntoi ki paidbah.
Heiyatoh wa ka Iawmusiang Market Complex, neiliang u Conrad da kular u wow pynlait namo wow Sanction poisa noh hapoh kini ki kajiak sngi wow wan.
Kamwa man katni kiwa kreh ka JHADC chem chitom bha ki nei dooh tulop iwa da ki phaw bnai wei da jan kynjoh chi snem, hajrong ini ki dkhot ka Committee da kyntu ki ya u Conrad wow pynlait smat ya ini wa chem chitom ka Council.
Neiliang u Conrad da kular u wow pynlait noh ya ka tulop yong ka Council chwa ka lehniam Behdieñkhlam uni u snem, khnang wa kiwa kreh ka Council u yoh ki u pyndap pynbiang yeiwa emkaam ki ha yung.
Ka Committee hadien wa yaphyllu yumut bha da sñiawbiang ko wow wanrah ya ka mat rukom pynkrehkaam kawa khut ha i ktien para ka Financial Reform iwa mut kammon wow pynbiang ya ka rukom pynpoi bait ya ka poisa cha ka Council khlem lai lyngba ki chnat waphær waphær.
Neipor cheipor i wym biang i rukom yoh tulop kiwa kreh ka Council toh neidaw wa boon ware ki chnat sorkar kiwa hap lai lyngba hadooh wow poi ka poisa cha ka Council wei ini da pyntlot i yei rukom poi ka poisa katkam ka bhah ka Council.
Discussion about this post