theme-sticky-logo-alt
theme-logo-alt
Advertisement ad1
Advertisement ad1

Kular u Conrad wow wanrah ya ki kaam pynroi ha ka thaaiñ Nokrek

Advertisement ad1

Shillong: U montri rangbah ka jylla, u Conrad K. Sangma ynnin ka sngi da lai u cha ka chnong Dura Kalakgre, West Garo Hills wow tip wei wow yaklam hajrong ki kaam pynroi ha ka chnong wa kiwa em marjan.

Ka Dura Kalakgre toh ka thaw neiwa saam um ya ka sor Tura waroh kawi wei em ko ha tre ki loom wa tip kam ka Nokrek Biosphere Reserve.

Advertisement ad1

Ka Dura Kalakgre toh kawa jngai kamwa 40 Km na Tura, kiwa chong chnong ka Oragitok, Chandigre, Tosekgre, Baladingre wa Sakalgre da yalang ki wei da pynsñiaw ki ya ki kaam wa yatoh wa emkaam ha kini ki thaaiñ.

U sarok wow lai cha kini ki chnong dang chna ya oo katni wei da kyntu ki ya u Conrad wow chimkhia u wow booddien ya ini i chna u wow pynsuk ya ki hawa kit ki ya ki mar rep yong ki khamtam u soh khontara.

Ki waheh chnong ka Dura Kalakgre, Tosekgre, Sakalgre wa Baladingre da ekti ki ya ka dorkhat heiwa da thoh ya ki bynta wa emkaam jhan bha hapoh kini ki chnong.

Ya u Conrad K. Sangma da synraan da u Chief Advisor yong u montri rangbah, u Thomas A. Sangma wa u Government Chief Whip u Marcuise Marak.

U Conrad da pyntip u wa hapoh ka Rural Infrastructure Development Fund yong ka NABARD, daw yaklam u hajrong i emkaam wow chna sarok.

“Ki chnong ha ki thaaiñ Nokrek man ki kiwa yirngam wei kiwa yoosuk, deiwa chna ya ki sarok wa miat ye u pynman yaaw ya ki chnong wow ye ki wow riñ ya kiwa uiñke suwari,” ong u Conrad K. Sangma.

Da kular u leh wow pynjanai yei rukom saam um cha kini ki chnong neibhah wa hanlada saam um mynkna ki ya ka Tura tangwa chah ieh won ki ha ka sorkar tangwa ha kani ka kynti won ym ieh de ya ki.

U Conrad da pdiang u leh yei emkaam wow chna ya ka Sub-Health Centre wei da phah u ya ka chnat i chait i khiah wow pyrkhat yeini ha uni u snem wow wan wow chna ya ka Sub-health Centre ha Dura Kalakgre.

Heiyatoh wa i pynku ya ka kaam uiñke suwari ha Nokrek da ong u wa ka ri US kwah ko wow wan chim ya ki bynta ka lieñsuiñ kawa haap heipor ka thma bah wa ar deiwa kyntu ya ki paidbah wow yada ya kani ka thaw.

Da pyntip u leh wa T. 22 klur da mang wow chna sarok, T. 12 klur wow chna ya ki View Point, Rest Area ha Nokrek, wei dang yooluti leh ya ka T. 600 klur na ka World Bank wow yada ya kani ka thaaiñ Nokrek Biosphere Reserve.

Share this:
Previous

Mynstep u sdang ka All Jañtia Meet ka JSU-SC da ka Futsal Tournament

Next

Kynmoo warom ka NSS-KNGC ya ka sngikha u Vallabhai Patel