Ka All Jaiñtia Sports and Games Forum hapoh i yahkhmat u Chairman, u Eddie Murphy H Passah wa u Secretary u Ambrose Gatphoh ryngkat wa kiwa kitkaam ka JSU nadooh u President, u Jersom Shylla wa u General Secretary, u Treiborlang R Suchen da lai yachem ki ya u Montri Rangbah ka jylla u Conrad K Sangma heiwa da e ya ka dorkhat hajrong i chah kyntait ka Ri-loom Jaiñtia haka lympung yalehke ka ri India ka 39th National Games ka wow man ha jylla.
Neiliang u Conrad da kular u wow e bhah ya ka Ri-loom Jaiñtia ha ka 39th National Games wei da mang leh hadooh T. 25 klur wow pynbha ya ka Wahiajer Football Stadium wei u man ko kawi na ki madan chimbynta yong ka lympung National Games namo ha ka lympung yalehke Khelo India wei da kular u leh wow pynmiat ya ka Kiang Nangbah Stadium wow e da u Synthetic Track wa ki Flood Light wei wow pynmiat ya ka Indoor Stadium.
U Chairman ka Forum da pynsñiaw u leh yei emkaam wow yoh ya ka madan wa paka ha Ri-loom Jaiñtia neibhah boon ki khynroo khyllood wa yalehke ka jylla mih ki na ka thaaiñ katwa kamtæ emkaam wow yoh ya ka madan wa paka wow pynjra doh ki.
U Treiborlang R Suchen uwa man leh uwa ektien ya ka Forum da ong u wa ka seiñ JSU da booddien ko ya ini i kaam nadooh u snem 2018 wei da dap dei sñiawkmen heiyatoh wa i kular u Conrad hajrong ini waroh.
