Hadien wa da pynkrehkaam ya ki kyndon wow khang sbak namo ka Lockdown ha waroh kawi ka jylla neidaw wa wan ar sien ka la’ær ka khlam COVID-19 nadooh wa sdang u Naisan da pynbor i ya ki seiñ kiwa khih mylla wa kiwa chongdai wow wan ki chaphrang wow sdang dawa na ka sorkar wow chah biang ya ki u khih u kreh ki kamwa jooh.
Ynne ka sngi ka All Jaiñtia Commercial Vehicle Association (AJCVA) wa ka Ri-loom Jaiñtia Traders Association (RJTA) da lai yachem ki ya u DC ka West Jaiñtia Hills wow dawa wow wai noh ya ki yaw ki haat wa ki kari kamai.
Neiliang u Paila Lyngkot uwa man kam u President ka RJTA waka AJVCA da ong u wa hadien i yachem wa u DC, neiliang yong oo da kular u wow chah noh wow wai ki dukan wa ki kari kamai nadooh ka 21 tarik (Monday) uni u bnai deiwa chah u sdang u wai da ka Odd Even Number ya ki dukan wa ki kari kamai.
Chooh chooh u DC da ong che u leh wa da chah chwa ya kiwa dadep chim tika yada COVID-19 wei hajrong ini, neiliang ki ar seiñ da kyrpaad ki ya u DC neibhah wa daw chimpor ya kiwa chongdai wa kiwa kamai kari heiyatoh wa i chim tika.
Ki ar seiñ da kyrpaad ki leh ya kiwa boon wow man ki kiwa yaichah ha kini ki sngi wow wan khnang wow ye u wai biang kam heipor wa dadep.