Delhi: U Prime Minister u Narendra Modi da kular u ya waroh ki tre ri wa ka Citizenship Amendment Act ym ktah ko ya kiwon kiwon ki tre ri ka India kiwa ngait ha kawon kawon ka niam.
Haki Tweet wa pynmih u da ong u, “Ki yakhih wa da kylla chadooh i mynsoo pyrchah yaka Citizenship Amendment Act man ki kiwa sñiawsih bha wei kjut nood wow yoo.”
Da ong u wa da i yatai nia, i ya phyllu, i yaklam hadooh i ya pyrchah man i chibynta ka synchaar paidbah, tangwa i tympra ya ki yung ki thaw paidbah, u pynthut yei imlang sahlang won ym toh i rukom namo i luti.
Da ong u leh wa ka Citizenship Amendment Act, 2019 da mynjur yaka da waroh ar ki yung dorbar ka Parliament deiwa yoh chiboon ki kyrchaan. Deiwa yoh leh yei kyrchaan na kiwa boon ki Party wa ki MP. Wei kani ka aiñ pynyoo ko yei dustur ka India kiwa da ki spah snem wow pdiang ya kiwi, i em mynsien wyrai, wa i maya uwi ya uwi.
“Nga kwah O wow ong deiwa ym em i artatien deiwa bait cha waroh ki para ri wa ka CAA ym ktah ko ya kiwon kiwon ki tre ri kiwa ngait ha kawon kawon ka niam. Kamtæ ym em wow hap khuslai na kani ka aiñ. Kani ka aiñ toh du ya kitu wa maad yei chah pynchitom na baar kiwa ym em thaw wow lai lait noh cha ka India”.
Da ong u leh wa iwa emkaam dooh kattæ toh wow ya krehlang yow pynku yaka India wei wow pynkupbor ya uwi pa uwi u nong India khamtam ya kiwa dooh wa duk wa kiwa em cha rood cha chmiang.
“Ym toh u e laad i ya kitu kiwa em i thmu wow phiah wow tympra, kiwa kwah wow wanrah yei kulmar.”
“Ini toh ki por wow wanrah yei suk i saiñ wa i maya iwi ya uwi wei kyrpaad O leh wow yait nei pynpoor ya ki khubor thok.”
Discussion about this post