U President ka Meghalaya Government Lower Primary School Contractual Teachers Association (MGLPSCTA), u Birbor Riangtem da pyntip u wa u Symbood Montri Rangbah, u Prestone Tynsong da kular u wow pyrchang wow thooh laad deiwa rah hapoh ka dhab ki Montri (Cabinet) hajrong i eh i khor wa chem kiwa sikai.
U Symbood Montri Rangbah ynne da yachem u ya ki heh kiwa sikai Contract wa da chah pyndam kreh noh ha ka sorkar, wei ini i yachem toh hadien wa kiwa sikai da pynman ki leh yei yakhih wa khor ha ka 6 tarik uni u bnai haphrang ka Secretariat wow dawa thung kreh biang.
Hadien ini i yachem u Birbor da pyntip u leh wa ha i yaklam wa u Prestone ym em man ko kawa hun ya kiwa sikai, neibhah man ko ka sien wa nyngkong wa yachem wei da pyntip u leh wa neiliang u Symbood Montri Rangbah da ong u wa ymye wow rai samen yeini wei daw rah ya ini i kaam ha ka Cabinet.
U Birbor da ong u leh wa u Symbood Montri Rangbah da phah biang u ya ki heh yong kiwa sikai Contract wow yachem biang hadien ka 20 tarik u Khonchonglad (Nov) uni u snem.
