New Delhi: U montri rangbah ka sorkar jylla, u Conrad K. Sangma chirup wa u montri ka tnat Toursim ka jylla, u Metbah Lyngdoh wa u montri ka tnat Sports ka jylla, u Banteidor Lyngdoh ynne da yachem ki ya u Union Youth Affairs and Sports Minister, u Col. Rajyavardhan Singh Rathore ha New Delhi.
U Conrad da pynsñiaw u ha u Rathore wa emkaam wow kyntu kynrong ya ka kaam yalehke Sport hapoh jylla heiwa daw pynman ya ka National Games ha u 2022.
“Da paan yarap i na ka sorkar pyrdi wow pynmiat pynbha ya ki thaw yalehke Sport hapoh ka jylla heiwa da kular u (Rathore) wow chimkhia ya kini waroh,” da ong u Conrad.
Da pyntip u wa ka Meghalaya da jan dep pynkhreh ko ya kiwa emkaam neibynta ka National Games 2022 wei ka thong hi toh wow chna ya ki thaw kiwa pliah kiwa katkam ka kyrdan wa emkaam wow pynman ya kani ka lympung ka wow pyntikna leh wa ka jylla waroh kawi u yoh ko yei roi i paar.
“Ka yalang wa u montri (Rathore) man ko kawa miat wa bha wei kyrmen i wa kattu daw sdang yoh i ya i yarap na ka sorkar pyrdi wow pynman ya kani ka lympung hapoh ka jylla,” da ong u Conrad.
Heijooh i por da yachem leh wa u montri wa pait ya ka Civil Aviation ka ri, u Suresh Prabhu chirup wa u montri ka tnat Transport ka jylla, u Sniawbhalang Dhar wow pynmiat ya ka kaam wow lai wow wan na suiñ namo kawa tip leh kam ka Air Connectibity hapoh Meghalaya.
“Da kyntu i leh ya ka Ministry wow kyntu kynrong ya kani ka kaam wei wow pynmiat ya ka Shillong Airport wei wow sdang pynkrehkaam wa ka Baljek Airport ha Garo Hills,” da ong u Conrad.
Discussion about this post