Ynne ka sngi u MDC ka Moodop Umladang, u Thombor Shiwat hadien wa chah jied kam u CEM wa thymme ka JHADC da sñiawngooh u wei dap u dei mynsien wa khia wa da jied ya oo kam u CEM ka Council.
Da ong u wa ymye wow man CEM waroh tangwa waroh em ki ka bynta ha jar jiar i bor wow lai lang chirup neibynta i bha i miat.
Chooh chooh da ong u wa man u u bru wa duna u wym biang hanla man MDC u la soo sien wei kam u CEM la le sien tangwa dang em u chiboon i duna deiwa kdaw ya ki por wa dadep wa chah klam chah pynbaad u.
Da kdaw u wa ha ki 6 snem wa dadep ym em yoh ya ki MDC Scheme wei kat iwa yoh poisa da yaleh wow su ya ka tulop kiwa kreh tangwa kattæ leh dang chah klam chah beiñ kamjooh i chah leh pyrchah u wa ki kattu katni ki EM ka Council.
Da kular u wow e chakri wa khooid kawa khlem arsap kawa khlem noh chiliang neibhah wa boonsien lada pynjoor dei yadung i yasooh daw ktah ko ya ka Council hi waroh kawi.
Heiyatoh wa ki EM kiwa daw thung hadien, da kyrpaad u ya ki para dkhot wow kdaw wow pynyoo ya ki luti ki laad wow wanrah ya i miat i bha ha ki por wow wan.
Chooh chooh da ong u wa emkaam yei krehlang hapyrdi ki sahep wa kiwa kreh ka Council khnang wow lait u man ka Council kawa sarom deiwa kyntu yei krehlang chirup waroh deiwa mylliñ wei booh ya ki kaam Politics charood.
Da kular u leh wow thooh ki luti ki laad wow su pyndep noh ya ka tulop kiwa kreh kat hadooh wow kut uni u snem krehkaam namo u Financial Year.
Discussion about this post