Ynne ka sngi u kyrtong ka Congress na Mowkaiaw, u Nehemayah Tyngkan da pynman u ya ka yalang Election ha Barato heiwa da wan da ki hajar na ka thaaiñ Elaka Thangraiñ wow wan ap ya ki kyntien na uni u kyrtong.
Ha kani ka yalang hawa e yei klam da ong u wa manda jop u neini u kreh u dei maya dei khooid mynsien wei kular u leh wym man u kam u ‘Dealer ‘wa saam khoo saam Scheme tangwa u man u kam u ‘Leader’ heijooh i por da ong u wa manda chah jied u daw man u kam u ‘Legislator’ uwa chna aiñ ym u ‘Distributor’ kam uwa saam mar cha kiwa dai dukan neibhah deiwa ye u chna aiñ daw ye u wow yada ya ka jaitbru kawa em ha kyndian synrang.
Da ong u wa ki manbei manpa kiwa em i bahkhlieh toh u tip ki kammon u man ka mynried ki khon yong ki neibhah ym kwah u wow sñiaw ya ki khynroo kiwa ong wa sdang ki wow dih neipor Election MDC næ MLA wei oo yieñ u wow yada ya ka mynried yong ka pateiñ waroh.
Chooh chooh da paan-maap u wa ymye u wow psiah cha waroh ki thlu yung tangwa maya u ya waroh wei itæ i maya yong oo ya ki toh chong i ha u dohnood yong oo neibhah i angnood u wow man MLA wow chakri paidbah ymtoh du dei kwah tangwa dei thngan wei ym kwah u wow dooh ya i thngan deiwa kyrpaad ya ki manyung wa kyrchaan ya ka UDP waka NPP wow e tang chi Vote na ka yung yong ki ya oo.
Ha kani ka sngi u Nehemayah da kun u ya ki umkhmat u heipor wa khana ya ki paidbah yeiwa kammon chah beh u ha chnong Sahsniang wei oo kam uwa wan na ka yung wa dooh wa duk wei u khonswet da kyrpaad u ya ki manbei manpa wow kyrchaan ya oo ha kani ka kynti neibhah wa manda jop u wow maya bait wei u kdup bait u ya kiwa chong chnong ka Sahsniang deiwa pynrap wa da ong u ya ki waheh chnong ka Iooksi wow pdiang sñiawbha ya waroh ki kyrtong cha ka chnong neibhah wa toh i hok i yong ki.
Heijooh i por da ong u wa hadien wa chah lehbeiñ u deiwa chah beh, da boon kiwa da sdang u kyrchaan noh ya oo na kiwi ki seiñ.
