Kut ka dorbar mang poisa ka JHADC

Jowai: Ka dorbar mang poisa ka Jaiñtia Hills Autonomous District Council ynne 23 tarik da mynjur ko ya ka mang poisa wa T. 83,35,48,600 kawa da wanrah hapoh yung dorbar ynnin ka 22 tarik da u Executive Member I/C Finance ma Joinriwell Pyrtuh.

Ha ka kynta wa nyngkong i yachong dorbar u Chairman ka JHADC u ma Laitsing Shylla da elad chwa u ya ki MDC ka liang synchaar waka liang pyrchah u pynyoo pynkdaw ki hajrong kani ka mang poisa hachwa u yoh ko yei mynjur. Kamtæ u ma R.S. Lyngdoh wa na ka liang pyrchah da pynyoo u kattu katni ki bynta wym em sniawhoon u.

Neiliang u chairman da elad u yow ma R. S. Lyngdoh u pynkhreh u ya ka cut motion hapoh chikynta chiteiñ heiwa da sdang biang ya ka yachong dorbar heipor 12:30 pyrdi sngi.

Heiwa wanrah ya ka Cut Motion u ma R.S. Lyngdoh da kdaw u ya ki kattu katni ki duna ha ka mang poisa wei da paan pynche u haroh na ka tnat Civil Work Department hajrong ki kattu katni ki kreh wa sah teiñ la ar le snem khamtam ki skhim naka 13 finance nalor kiwi kiwi won wa paan pynche yong oo.

Related posts

Lai ood ki MDC ka VPP ha ka sorkar wym yoh Scheme sorkar pyrdi ha ki Constituency wa em ha sor

May 13, 2025

Lada ka sorkar sñiaw ko wa emkaam palat ko wow wanrah luti rel ye ko wow lai chakhmat: Ardent

May 12, 2025

Kamtæ hadien wada yoh pynche u now CEM wa ki Executive Member da sniawhun u wei da pynkyrriah u leh ya ka cut motion.

Hachwa ini da pynsñiaw haroh u i sñiaw diaw hajrong i heh i pynlut wada tam hadooh T. 1,92,73,300 na ka poisa wada mang wow yohlum ha uni u snem 2016-2017, ong haroh u wa lyngba ka budget speech da yoo wa ka council da mang haroh ko wow rap pynmiat boon ki  kaam pynroi kynthup ya ka fishery wa ka fish sanctuary, hei yatoh weini da kylli u ileh won ya ka Yaw Pyngkat yong ka District Council wa em ha East Jaintia Hills District wym ym em paw ko haka mang poisa neibhah ha ki snem wada lai leh da jooh yaklam hapoh ka yung dorbar.

Hei sakhiat ha kani ka sngi da em leh ka motion wa da wanrah da u ma Moonlight Pariat hajrong i arwi awra ki thaw wa em haka chnong Mookyndur hapyrdi ka Jowai Elaka waka Maskut Elaka, kawi won ka motion da wanrah da u ma Marki Mulieh hajrong ki wah wa em ha Ri-loom Jaiñtia, tangwa kini ki arngut won ym em de pynkrehkaam ki ya motion wa wanrah ki neidaw wada em ki cha ka liang shynchaar.