Jowai: Ynne ka sngi da pynkut noh ya ka 5th Khulu Malang Memorial Football Tournament kawa pynlai da ka Socio & Economic Life Development (SELD) yong ka Jingiaseng Samla Sutnga District ha madan yalehbol yong ka Sutnga Mission. Ha kani ka sngi ka yalehke Final da pynman hapyrdi ka Jingiaseng Samla Balang Sutnga pyrchah ya ka Jingiaseng Samla Balang Mookympad heiwa ka yalehke man ko kawa yabiang bor bha wa kawa yoosuk heiwa yei naam jop da yoh daka Jingiaseng Samla Balang Sutnga da 2-0 da ki kool wa thap u Rilang Malang wa u Mewad Bareh.
Hadien ini da yoh yaka yaka yalehke Friendly Match hapydri ka liang ki Pastor wa Tymmen Basan yong ka Sutnga District pyrchah ya ki Rangbah Balang ka Sutnga District, wei ha kani ka yalehke da jop da ki Pastor wa Tymmen Basan da 3-1 wei ya kini ki kool da thap ar tylli da u Tymmen Basan u Warning Shadap, chi kool da u Tymmen Basan Dr. J.W. Dkhar katwa yaka chi kool neibynta ki Rangbah Balang da thap da u Rangbah Balang u Lekijuh Bamon.
Da em leh ka Final yong ka Penalty Shoot Out neibynta ki kynthai wei ha kani ka yachut ka Jingiaseng Samla Balang Sutnga da jop ko yaka Jingiaseng Samla Balang Mookympad.
Haka yaphet pyllah ka 100 Meter Race, kiwa jop haka kyrdan ki chynrang wa kynthai man ki kamni ha wah:
1st u Enguh Syrti, Balang Moopala, 2nd u Trememon Bamon, Balang Moopala, 3rd u Nehlang Shyrmang, Balang Sutnga.
Ha ki kynthai won kiwa jop toh ka, 1st ka Daroi Suchiang, Balang Sutnga,
2nd ka Willy Grace Bareh, Balang Sutnga, 3rd ka Haphalambha Sutnga, Balang Sutnga.
Ya kani ka Tournament da wan pynhaap pyrda da u Tbn. Dr. J.W.Dkhar kam u kongsan.
Ini toh katkam wa pyntip u u Secretary ka SELD Jingiaseng Samla Sutnga District, u Mehiwot Shadap.
Discussion about this post