Ka 6th Khulumala Memorial Football Tournament yong ka Jingiaseng Samla Pala District da poi ko chawa kut ha ka 13 tarik uni u bnai ha ha Madan yalehke ka Balang Presbyterian Kseh deiwa yoh wow pynman ya ka yalang wa tbian hapoh i yahkhmat u Chairman ka Jingiaseng Samla District, u Tbn. D.S. Salahe.
Ha kani ka sngi da emlang ka Synta Mary Shylla kam ka kongsan wa u Chibor Wahlang kam u symbood kongsan ryngkat ki Pastor, ki Tymmen Wasan wa kiwi kiwa da chah khut sñiawbha.
Hawa sdang da yoh i klam na u Rev. D.H. Malang, Pastor In-Charge, heiwa da kitbok ya ki khynroo, hadien da yoh won i klam na u Chibor Wahlang uwa pynchlur ya ka District wow pynman chooh ya ki yalehke wa har rukom khnang wow lait ki khynnah na ki kaam wa sih.
Kam ka kongsan, ka Synta Mary Shylla da sñiawngooh ko ya ka District wa pynman ko ya kani ka yalehke heiwa da kyntu ko ya ki khynnah wow man kiwa smat wa stiñ ha ki kaam pynjra doh ha kiwa boon ki jait yalehke Sports neibynta i myntoi i doh i pran kamjooh i tjij i pyrkhat khnang wow man ki leh kam ka nongmuna ya kiwi tawon.
Ha kani ka sngi da yoh ya i yalehke Football ki kynthai wa ki chynrang ryngkat u yakob phet wa 100 M du ya ki kynthai.
Ha ka yalehke Final ki kynthai, ka Jingiaseng Samla Balang Umkyrpong da jop ko ya ka Jingiaseng Samla Balang Kseh da ka Tie Breaker 5-3.
Ha ka 100 M Race ka Daplin Pasleiñ na ka Balang Umkyrpong da yoh nyngkong ko bood sa ka Sumarbha Manar na Balang Kseh hei wa ar katwa ka Phidora Pasleiñ na Balang Pala hei wa le.
Ka yakhun Final Football ki chynrang, ka Jingiaseng Samla Balang Umkyrpong da jop ko ya ka Jingiaseng Samla Balang Larket da ka Tie Breaker 5-4.
Kiwa jop ha waroh u mihkhmat ki cha ka Jingiaseng Samla Sutnga Presbytery ka wow man ha u Naichiphaw 2022.
Heiyatoh wa i pynkut ka Jingiaseng Samla Pala District da e khublei ya ki kongsan khamtam wa man ka lympung yalehke kawa jop, da e khublei ya ki Pastor wa ki Tymmen Wasan yong ka Jingiaseng Samla Pala District wa kiwa na baar leh.
