U Montri Rangbah ka jylla, u Conrad K Sangma da ong u wow chim bait du da ki kot ki sla næ ki dulir, ki Map lane ki khana pateiñ ym ye ki wow pynbait ya u pood u ang wa ka jylla Assam. Da ong u wa ini ym mut wa kitæ ki dulir ym em man ki kiwa emkaam, tangwa iyi wa ka sorkar da leh toh wow pyndooh yei eh, neibhah i eh ha khappood ym ye wow pynbait du da iwa booh ya ki kot ki sla na waroh arliang.
Hawa klam wa ki laad pathai khubor da ong u wa kam kiwa chong chnong em i kwah wa ki thaw wa katkam ka Map u haap bait cha Meghalaya, tangwa da pynrap wa lada klam yei yong sakhiat, itæ ym ye wow man neibhah ka Assam ka rap em ko boon ki kot ki sla wa ki Map bar ya ka Meghalaya.
Da ong u wa ki Hima wa ki Raij ki em ki ya ka hok wow yakhun lane u pynsñiaw hadooh ha Kachari, tangwa neiliang ka sorkar da klam che wa leh ko ya iwa toh u leh deiwa booh hakhmat leh ya i myntoi ki paidbah wa toh hajrong i mon ki paidbah ka sorkar da lai ko chakhmat.
Da ong chooh chooh ba lada chim bait du katkam ki Map wa ki kot ki sla, dang neh bait ha i yaklam wei wow pynneh ya ka ‘Status Quo’.
Hawa yatoh wa i dawa kiwa boon ki liang, khamtam na ki khlieh synchaar wow bichaar biang ya ka soskular lane ka Memorandum of Understanding (MoU). U Montri Rangbah da ong u wa i wym ye de ka sorkar wow pait biang lane u bichaar biang ya ka MoU, toh neidaw wa kani ka kaam da leh sani bha, wei lada hap wow pait biang, waroh kiwa ka sorkar da leh ko daw sepai neibhah hap uiñ biang nadooh wa sdang.
Da ong u wa ka sorkar ka sñiaw ko wa ka leh ko ya iwa bha tam, hawa ka jylla ka da yoh nong wei kiwa boon na ki paidbah ha ki khappood ki hun ki, wot la em ki wym hun heini heitai.
U Conrad da ong chooh chooh u wa lada pait biang leh ya ka MoU, ym ye wow wanrah boon ki pynkylla, wei lada leh kamtæ kitu ki thaw wa da pynbait leh hap wow pynbait biang wei daw nang kyllaaiñ chooh chooh.
