15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1

Kutnoh ka tamasa Moopun Festival ha Mutong, pynbna u DC wow pyllait poisa yow pynbha ya ki thaw uiñke suwari

0 Comments

Jowai: Ka tamasa lehkmen yaka sngi kyrpang kiwa uiñke suwari namo ka World Tourism Day da kut noh ko ynnin ka 28 tarik kam chibynta ka Moopun Festival heiwa u Kyrmen Shylla da man u kam u kongsan wei da kular u leh wow pynlut hadooh T. 2 lak neibynta wow chna paikhana ha katai ka thaw neibynta wow wanrah yaka khooid ka suba.

Ka Mutong Tourism Promotion and Environment Protection Society kawa pynman ya kani ka tamasa ha ka sien kawa ar, kawa da sdang nyngkong yaka hapoh i yahkhmat u Helping Phawa, waheh chnong ka Mutong deilang wa u DC warom ka EJH u Mahamsingh Lhuid ha kitu ki por.

Advertisement ad1

Ha uni u snem leh, da pynman leh ya kani ka tamasa deiwa ya krehlang waka yungkrehkaam u Deputy Commissioner, EJH, u FM Dopth deilang waka EJH Tourism Society hapoh i yahkhmat u Dr. Phervision Nongtdu, Principal ka Jaiñtia Eastern College, ki dkhot ka NSS katai ka College nalor i kyrchaan ka Jaintia Hills Cement Manufacturing Association.

U FM Dopth da man u kam u kongsan haka sngi wai ya katai ka tamasa katwa u montri ka chnat Revenue, Disaster wa Social Welfare u Kyrmen Shylla da man u kam u kongsan wow pynhaap pyrda ya ka.

Kani ka tamasa da man ko kawa phooh wa phieñ nadooh ka sngi nyngkong ha ka 27 tarik heiwa kiwa lai puræ na ki College deilang wa ki khynroo khyllood ka chnong Mutong wa Cham Cham da pynman ki ya ka lai kjat (Trekking cum Cleaning Drive) wow jied Plastic tymbud luti wah Myntdu nadooh Sahksaw chadooh cha Kai-longdong wei chadooh cha Kchaaid Moopun kawa noh cha wah Myntdu.

Kiwa klam, nadooh u DC hadooh u montri wa kiwi kiwi da yaroh ki yaka chnong Mutong kawa da pynman ya kani ka tamasa neibynta wow yada ya ka rymaw wei wow kyntu yaka yoh ka kot ki paidbah lyngba kani ka thaw kawa miat.

U Deputy Commissioner ka EJH, u FM Dopth da ong u wa neiliang ka yung krehkaam daw pyllait noh ya ka poisa wa da pyllang lyngba ka District Mineral Fund neibynta wow pynbha chooh chooh ya ki thaw uiñke suwari ha katai ka thaaiñ nadooh ka kchaaid Moopun, Rynji wei kamjooh ya ka Latang.

Neiliang u Kyrmen kam u local MLA kamjooh u montri sorkar da ong u wa kani man ko ka nongmuna ya kiwi won ki chnong wow bood ya iwa leh ka chnong Mutong wow yada yaka rymaw wei wow pynbha ya ki thaw wa kam kini ki wow taan ya ki bru na kylleiñ khnang wa ka yoh ka kot ki paidbah u ku ko ha ka jylla leh kamjooh.

U Principal ka Jaiñtia Eastern College hawa klam da kyntu u ya ki paidbah wow man ki ki bru kiwa stat wow pdiang ya kitu kiwa wan na baar ym toh wow klam da ki ktien wa khor ya ki wei da kyntu u khamtam ya ki khynroo khyllood ka chnong wow man ki kiwa smat wow yarap ya iwon iwon iwa eh wa chem kiwa uiñ suwari.

Ha kani ka Tamasa da em ki chaad tynre, ki yakob kiwa da sikai da u warim wajah wei boon kiwi kiwi nalor ki baam wa ki dih tynre.

Previous
Next

0 Comments

Leave a Reply