Ka Hill State People’s Democratic Party (HSPDP) da rai ko wow thoh cha ka sorkar Meghalaya Democratic Alliance (MDA) neibynta wow chim noh da ka Resolution hapoh ka yung dorbar wow kyntu ya ka sorkar bei wow pynkylla namo Amend noh ya ka Para 12 A (b) yong ka Sixth Schedule ka riti synchaar ka ri.
Ya kani ka rai ka HSPDP da chim ha ka yalang yong ka Central Executive Committee (CEC) kawa da pynman ynne ka sngi hapoh MLA Hostel.
Hawa klam cha ki laad pathai khubor hadien wa wai ka yalang, u Secretary ka HSPDP u Renikton Lyngdoh Tongkhar uwa man leh u Montri hapoh ka sorkar jylla da ong u, “Kam ka seiñ i daw phah i da i thoh cha u Montri Rangbah ka jylla u Conrad K Sangma hajrong i emkaam wow wanrah noh da ka rai næ ka Resolution yong ka sorkar wow pynkylla namo wow Amend ya ka Para 12 A (b) yong ka Sixth Schedule ha kani ka chong dorbar ka wow man ha u bnai wow wan.”
U Renikton da ong u i kaam ym toh de iwa thymme tangwa kam ka seiñ da jooh yaklam ko na i por cha i por wei i thmu yong ini i tyrwa wow pynkylla toh wow e bor yow pynkhlan ya ka jylla wa ym pynkrehkaam ya kiwon kiwon ki aiñ yong ka sorkar bei ki wym yahap yahap wow pyn kynkrehkaam ha ki thaw kiwa haap hapoh ki Sixth Schedule.
Da ong wei da e nongmuna u wa ha Assam, u Lat katai ka jylla da pynmih ya ka Notification namo i pynbna wym pynkrehkaam ya kiwon kiwon ki aiñ ki wym yahap wa ka dustur riti namo ka rukom man i thaw yong ki, tangwa sñiawsih won wa ha Meghalaya, hap wow yoh bor na u President ka ri wow pynmih ya ka Notification wa ym pynkrehkaam ya kitæ ki aiñ, wei kam ka seiñ ka sñiaw ko wa da booh du wow pyndep rukom ya iwa man katni.
Da ong u wa ka seiñ da yooluti ko wa u Montri Rangbah daw rah u ya ini i kaam ha ka yalang ki Montri yow yaklam yatai. Da pyntip u leh wa neidaw wym em u Montri Rangbah ha nongbah Shillong, kamtæ ka seiñ daw lai e ko dei thoh cha ka sorkar ha ka 25 tarik uni u bnai.
