15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1
Advertisement ad1

Advertisement ad1

Advertisement ad1

Kwah ka liang pyrchah ka JHADC wow pyrkhat yei boon palat ki wakreh hapoh ka Council

0 Comments

Jowai: Ka dorbar lyiur yong ka Jaiñtia Hills Autonomous District Council kawa sdang ynne ka sngi hapoh ka yung dorbar yong ka Council kawa yahkhmat da u Chairman u Lakhon Biam wei haka kynta booh ya ki phang kylli wei jubab, uwa yahkhmat ka liang pyrchah u Awhai Andrew Shullai da kylli u naka Executive Committee wa lada em næ ym em ki aiñ wa da pynkhreh haki Elaka neibynta wow yada wow pynneh pynsah yaki riti dustur, u EM In-charge u F. Bareh da jubab u wa neiliang yong ki da dep thoh cha ki Dolloi wow pynpoi yaki rukom synchaar ha jar jiar yong ki Elaka tangwa hadooh ynne ka sngi ym pu yoh iyi iyi leh na ki Dolloi.

U Andrew da e nongmuna u leh ya i kulmar wa mih ha chnong Sohmynting heiyatoh wa i rukom thung waheh chnong wa jooh shynchaar du da ka kur Pyrtuh nadooh nachwa katkam ka riti dustur, neiliang u F. Bareh da jubab u wa hadien wa ya chim yumut wa u Dolloi kamjooh ki bru waheh katai ka chnong, da chem wa ka kur Pyrtuh ym ko ki kit ki sla wow pynsakhiat wa em ko ya ini i hok, nalor wa haki le soo snem nachwa da jooh thung waheh chnong da uwa naka kur Lyngdoh. 

Neitæ da kylli u leh ya ki laad ki luti wa ka EC da leh ko hawa yatoh wow smat u chna pyndep yaka Iawmusiang Market Complex wa dang sahteiñ hadooh katni, u CEM u Thombor Shiwat da jubab u wa i slem wow yoh yaka 2nd Instalment toh wa em i pynkylla ya bai chna (Estimate) wei neiliang yong ki leh em ki i thrang wow pyndep smat wei dang pyrchang ki yaki laad ki luti wa toh u leh, kamtæ yooluti ki wa ym slem daw yoh yaka poisa wa sah yow pynkreh biang. 

Chooh chooh neiliang u Andrew Shullai da ban joor u hajrong wa liat rood ka poisa wa toh hok wow poi chaka Council naki ar tylli ki Check Point yong ka, deiwa ong wa i em ki kari baar jylla kiwa yoh ksoh kiwa khlem biang ki kot ki sla nadooh u Wisu (March) hadooh u Naiynru (June) ym yahap ko waka poisa wa poi cha ka Council, kamtæ da kyntu joor u yaka EC wow thooh ki laad ki luti naka bynta wow pyndooh yei liat rood neibhah kani ka ktah ko yaka yarong poisa ka Council kawa em hapyrdi i chitom poisa.

Kiwi de kiwa naka liang pyrchah kiwa da kylli kynthup ki ya u Aiborlang Shadap, u Holando Lamin wa u Arborhima Darnei.

Hadien ini da kynmoo warom leh ya u MDC warim ka JHADC uwa da khlaad u (L) Arwot Lamare wei da yoh leh ya ki ktien sñiawlem na u CEM.

Da wanrah leh hapoh ka yung dorbar yaka Bill The Jaiñtia Hills Autonomous District Council (Election to the office of Dolloi) rules 2019, da u EM In-charge u  F. Bareh, katwa uwa yahkhmat ka liang pyrchah u A.A. Shullai da wanrah u yaka Resolution hawa yatoh wa boon palat ki wakreh ka Council, neibhah naka por cha ka por dang joor i thung kaam wei i chna yaki Post kawa da jia nadooh nachwa kawa da wanrah yei eh bha yaka Council heiyatoh waka yarong poisa, kamtæ da kyntu u yaka EC wa toh u thooh laad thooh luti hajrong wa kammon wow pynbha yaka rukom krehkaam ka Council.

Kamtæ haka ya chong dorbar wa bood neibynta wow phyllu yumut hajrong katai ka Bill wa ka Resolution kawa da chimbynta da kiwa boon ki MDC kiwa da pynsñiaw ya ka Resolution wei da kyrpaad leh wow e por yaka EC wow bichaar bniah ya kani ka kaam, u Awhai Andrew Shullai da pyndam noh u ya ka Resolution wa da wanrah u.

Share this:
Previous

Wai u Hamlet ya ka Multi Facility Centre kawa T. 33 Lak ha Mylliem Mawkhar

Next

Maham ka HFU ya kiwa ah kilo ki mar rep ha ki yaw waphær waphær