Jowai : Ka chnong Mookyndur neipor cheipor da kwah ko u mih noh na Elaka Jowai wei da kwah ko u psiah noh cha ka Elaka Muskut.
Yeini da pynsñiaw ki Waheh Chnong chirup wa ki dkhot ka chnong cha u CEM ka JHADC heiwa da pynchong nongrim yeini da ki parom khana pateiñ (History) na ki por warim wajah.
Da kam ki wa ka Wah Lahweh toh ka wah wa chong ki Blai ki Syiem yong ki wei harood kani ka wah em leh ka Aitnar wei harood kani hi ka wah jooh pynman ki ya ka Chaad Pastieh.
U Lum Kyrpad toh uwa em ha ka chnong Mookyndur toh i thaw wa lehniam ka Elaka Muskut wei heini i thaw leh da em u moopynyieñ na ki por nachwa. Ha chnong Mookyndur leh em ka Biar kawa jooh lehniam ki, wei hajan kani em ka nan yong u Syiem Malniang man i i thaw wa noh u ya u Pathoo ksiar wa ka tyngkrong ksiar pathoo.
Sa kawi won ka thaw lehniam toh u Lum Bamtlang wei ha kani ka thaw em boon tylli ki moopynyieñ wei da kam wa hapoh ka Hima Madur Muskut da em ar tylli ki Iaw hapoh ka chnong Mookyndur kawa da tip kam ka Iaw Dai Miaw wa ka Iaw Dai Ja.
Da kam wa ka Um Saitsnær kawa em ha chnong Muskut u Syiem Kyllong Raja kawa jooh sait snær u, em ko hapoh ka Chnong Muskut.
Da ong ki leh wa da em leh ki kur Mukhim jooh man Dolloi ki ha ka Elaka Muskut.
U pood u ang yong ka chnong Mookyndur da kam wa toh kawa bakla neibhah wa ya kani ka Map wa da chna ha u snem 1996 toh kawa ym em u leh da u Revenue Officer ka JHADC tangwa kawa da leh da u Waheh Chnong ka Mookyndur khlem pyntip cha waroh kiwa chong chnong, kamtæ em ki bynta ka chnong Mookyndur ym em haap ki hapoh u pood u ang yong ka chnong.
Deiwa pynchongrim ya kini ki mat wa da kdaw katkam ka chithi wa da phah cha u CEM ka JHADC da pynksan ki wa ka Mookyndur wa ka Muskut em i yatoh wa yajan bha nadooh ki por warim wa man ki iwi don hapoh ka Elaka Muskut.
Read Also: U pynwiar namo u pynneh ka JHADC ya ka Elaka Maskut?
Discussion about this post