U Tirot Sing, u Syiem ka Hima Nongkhlaw uwa man leh kam u khlawait yong ka ri Khasi-Jaiñtia ha ki snem 1800 uwa da khlaad hapoh patok wa em ha Dacca ha itu i por kawa tip katni kam ka Dhaka ka nongbah yong ka ri Bangladesh. Tangwa ha ka thaw kset patok ya oo ym em iyi iyi iwa da thoh chaphang yong oo.
Kamtæ haka 16 tarik kawa man leh kam ka sngi wa wai ya u motdur sah naam u Tirot Sing ha Dhaka deiwa emlang ki Montri ka sorkar Meghalaya, da lai ki leh yow pait ya kani ka thaw kset wei da kwah ki wow pynkylla noh ka cha ka Museum yow yoh u em i toh i tar leh chaphang uni u khlawait.
Neiliang u u Deputy Chief Minister ka jylla, u Sniawbhalang Dhar uwa yahkhmat ya kiwa mihkhmat ka jylla cha Dhaka, da ong u wa ka sorkar u chimkhia ko wa u Tirot Sing Syiem u yoh u yei thaw haka Museum kawa sorkar Bangladesh thmu ko u chna.
Da khana u wa kamwa man kattæ ha Bangladesh ym em ka bui kawa khana chaphang u Syiem Tirot Sing ha kani ka thaw wa da kset ya oo ha u snem 1833 hadooh 1835 wei ka sorkar Meghalaya daw thoh ko cha ka sorkar Bangladesh wow e thaw yow booh pynsahnaam ya u Tirot Sing.
U Montri ka chnat Arts and Culture, u Paul Lyngdoh da ong u wa i thmu ini i lai cha Bangladesh toh yow pynneh pynsah yei pyrtuid u khlawait Tirot Sing ha kani ka thaw wei daw phah yei tyrwa cha ka sorkar Bangladesh wow pynsahnaam ya u Tirot Sing ha kani ka thaw wa da pynlut u ya ki sngi wa khaddooh u.
Ya kani ka patok kamwa man kattæ da ieh khlem da pynchna pynmiat wei pynkhooid, tangwa da sñiawthooh wa ka sorkar Bangladesh da em ko i thmu wow pynkylla dur noh ya katai ka thaw yow man ko kam ka thaw wow sahnaam ki bru wa khroo kamjooh ka thaw lai ke wei da kyrmen u emlang u Syiem Tirot Sing kamwa da chah u chna ya u motdur ha katai ka ri wei daw yoh leh yei thaw wow booh sahnaam ha katai ka Museum kawa daw chna ha Dhaka, Bangladesh.
Discussion about this post