Shillong: Ka United Democratic Party (UDP) wa ka Hills State People’s Democratic Party (HSPDP), ki seiñ saiñ pyrthai ri-loom ka jylla, da yooluti ki wow wow krehlang ha kani ka Election MDC cha ka KHADC wow yoh ki boon ngut ki MDC ha uni u snem wow wan.
U General Secretary ka UDP, u Dr. Jemino Mawthoh da ong u wa hadooh katni ym pu em i klam hapyrdi kini ki ar seiñ, tangwa da yooluti wow krehlang kam ha kani ka Election MLA kawa da dep ha uni u snem.
“I da yooluti i wa daw em i ya sñiawthooh yumut ha ki Constituency waphær waphær neibynta ka Election KHADC,” da ong u Dr. Jemino hadien wa da kut ka yalang ka Central Executive Commitee ynne ka sngi.
Da pyntip u leh wa ka UDP da chna ko ya ka Sub-Committee wow yahkhmat da u Working President u Paul Lyngdoh wow pynlang wei wow kdaw leh ya ka Committee kawa da pynkhreh neibynta i yabhah Constituency hapyrdi kini ki ar tylli ki Party.
Ha iwi tawon i liang da ong u wa iwa ym em iwa eh ya kini ki ar tylli ki seiñ saiñ pyrthai wow krehlang ki neibhah da yooluti wa da em ka sñiawthooh yumut.
“I ye i u wow yatoh wa ka HSPDP kam ki paralok kamwa da ya krehlang ha ka sorkar MDA. I u yakrehlang i neibynta ka Election cha ka yung Dorbar KHADC wei hadien ye i leh wow krehlang neibynta ka Jaiñtia Hills Autonomous District Council (JHADC) ha ka Election wow wan,” da ong uni uwa yahkhmat ka UDP.
Ha i jooh i por u Dr. Jemino da pyntip u wa ka UDP da chna ko leh ya ka State Election Committee neibynta ka Election cha ka Lok Sabha ka wow man ha u snem 2019.
Ki dkhot kiwa em ha ka State Election Committee kynthup ki ya u u President ka UDP u Dr. Donkupar Roy, u General Secretary kam u Jemino Mawthoh, u Vice President u Allantry F Dkhar, ki MLA ka Party, ki President ka UDP na ki District waphær waphær, u Bindo Mathew Lanong, ka Smeera A Sangma, ka Pretty Kharpynrope, ka Banalari Khongwar wa kiwi kiwi.
Discussion about this post