Shillong: U President ka United Democratic Party (UDP), u Dr. Donkupar Roy, da ong u wa ka party ym em booh kyndon chwa ko ya ki seiñ saiñ-pyrthai kiwa ya synrop ha ka sorkar Meghalaya Democratic Alliance (MDA) hajrong i thmu wow elaad ya ki kyrtong MP wow yakhun ha ka Election wow wan.
“Kam ka party, i kwah i wa ka NPP u yakhun ko na Tura wa ka UDP na Shillong Seat,” da ong u Dr. Donkupar hawa yaklam wa kiwa pathai khubor. Da pynsñiaw u wa ka party dang thooh kyrtong wa monlang na waroh ar tylli ki MP Constituency – Tura wa Shillong, wei kwah tyrwa ko yei pyrtuid u kyrtong uwa ye wow pdiang da ki seiñ saiñ-pyrthai kiwa synrop ha ka sorkar MDA.
Hawa jubab yeiwa kylli, da ong wa dang yaklam yeini wa ka MDA. “Em i phyllu yumut hapyrdi kiwa kitkaam ki seiñ saiñ-pyrthai kiwa synrop ha ka sorkar MDA, waroh na ki hi kwah ki wow em uwi u kyrtong wa monlang,” da ong u President ka UDP.
Da ong u wa i kylli wa em hakhmat toh lada ye u poi cha i sñiawthooh yumut na kawon ka party ya u kyrtong.
Hawa kylli iyi wa ka UDP daw leh ko lada ki seiñ saiñ-pyrthai kiwa synrop ha ka MDA ym sñiaw yahaap ki yahaap ki yei tyrwa ka UDP, da ong wa ka party kyrmen yeiwa bha tam.
Rap nachwa u symbood montri rangbah wei man leh uwa yahkhmat uwa da rap heh ka NPP, u Prestone Tynsong, da pynsñiaw wa ka party dang yaklam ko yeini wei neiliang yong oo hi u pdiang u ya i e yumut ka UDP wow em da u kyrtong monlang na ka Shillong wa Tura Parliamentary Constituency.
Discussion about this post