Jowai: Ki ar seiñ kiwa kynthup ya ka Jaintia Youth Federation (JYF) wa ka Jaintia Student Union (JSU) hei lai yachem wa u Deputy Superitendent of Police (DSP), da paan ki u pynche u hei yatoh wa slem u takit yei pynemkaam bakla u CEM warim ka JHADC u ma Madonbai Rymbai ya ka poisa paidbah, kawa da mih pyrthai ha u snem 2014 lyngba ka jubab RTI, kawa da yoh da ka kong Arlin Dkhar na ka chnong Moo Pyllaitsyiar, Khliehtyrshi.
Neiliang u DSP ka West Jaintia Hills District, uwa toh u takit yei kaam baamsap kawa kynjoh chadooh T. 1,18,50,000 kawa kynthup ya ka Discretionary Grant (DG) kawa kynjoh hadooh T. 66 Lakh wa ka Gratuity Relief kawa kynjooh hadooh T. 52,50,000 da u CEM warim u Ma Madonbai Rymbai uwa man leh u MDC ka Khliehtyrshi-Sohmynting.
Katkam ka khubor na u President ka JYF, u ma P. Majaw da ong u wa u DSP da pyntip u wa i takit da man i iwa dadep waroh, tangwa iwa dang sah toh sei wow yoh tang ya ka Prosecution Sanction na ka sorkar wow phah ki cha ka yung kasari wow bichar wow pyndep yei kaam wa dang sah.
“Kawa phylla ya i kam ki seiñbhalang wa ya ki paidbah ka Ri-Loom Jaintia toh u takit deiwa khooid, tangwa kattu la ar snem tam ki pulit ym pu ye ki u pyndep næ yoh ya ka Prosecution Sanction na ka sorkar jylla? Neiyi ma-ai i daw? Ileh ka aiñ yapher ko mo na ki khian kiwa dooh wa kiwa heh wa haiñ? Neibhah kiwa baamsap kiwa mih pyrtuid leh ym pu ye u pynchitom ya ki katkam ka aiñ hadooh katni” da kynnoh ka khubor wa pyllait ki ar seiñ.
Heijooh i por kini ki ar seiñ da ong ki wa ym chong kli kti wei daw pteiñ ki u bood dien yeini i kaam baamsap CEM warim ka JHADC u ma MB Rymbai, hadooh wa ki paidbah yong ka Ri-Loom Jaintia u yoh biang ki yei hok kawa da dooh ki nei pynemkaam bakla yei pyrtuid yong ki da u CEM warim ka JHADC, khnang wa ym jia de kam kini ki kaam neini chaphrang weiwa toh u pynchitom ya kiwa emkti heini kaam waroh.
Discussion about this post