U Montri Rangbah ka jylla, u Conrad K Sangma da pyntip u wa ha i yachem wa u montri ki kaam pohyung ka sorkar pyrdi, u Amit Shah da yaklam yillu bha hajrong ka Meghalaya Residents Safety and Security Act wa ka Inner Line Permit.
Da ong u wa i yachem da man i iwa mihsoh khamtam wow lai chaphrang neibynta wow pynkrehkaam ya ka MRSSA, heiwa da pyntip u leh wa u Shah da klam che u wa ka MRSSA ymtoh u ktah ko ya kiwa chong chnong ka ri India.
Hajrong i kwah yachem ki seiñbhalang, u Shah da pynsñiaw u wa kwah u wow yaklam boon kynta wa ki seiñbhalang ha ka jylla manda wan u ha u Wisu uni u snem.
Ha i yachem daw yaklam khamtam neibynta ki laad kammon wow yada yei mantre kiwa chong chnong ka jylla wa ka thaaiñ mihsngi hi waroh kawi katkam ka riti synchaar ka ri.
