Uwa yahkhmat ka Bharatiya Janata Party uwa man leh u MLA na Pynthorumkhrah, u Alexander Laloo Hek da pynsñiaw u wa ka BJP toh u chna ko ya ka Executive Committee ha Garo Hills Autonomous District Council deilang wa ka NPP, kamwa da leh ha ka sorkar synrop MDA.
Da ong u wa kamwa da yoo wa katni ka BJP da soohthied ko ha ka jylla, neibhah wot ki kyrtong kiwa rem leh toh kiwa chah tam du malu mala, heiwa da ong u leh wa da ini i jop wa 2 Seat ha GHADC, ka BJP ye ko wow jop leh ha ka Elelction MLA ha u snem 2023 hadooh 7 ngut du ha Garo Hills.
Hawa kylli wa neiliang u Vice President uwa da pynbaad ya ki kaam baam-tooh ka sorkar MDA wa yahkhmat da ka NPP, neiliang u Hek ym kyntait u ya iyi wa u Bernard Marak uwa jop kam u MDC na Tura da kynthah u pyrchah ya ka sorkar, tangwa da ong wa katni hap wow pyrkhat won neibynta i bha.
Da klam che u leh wa hadooh katni ka BJP ym pu chim ko ya i rai wow chna EC wa kawon kawon ka Party, tangwa ya ini i kaam chong ha i sñiawbiang yong kiwa yalam ka Party wow chim neibynta wa bha tam, wei ha i jooh i por da pyntip u leh wa u Vice President ka Party wa pait ya ka jylla Meghalaya, u M Chuba Ao wa u President ka Meghalaya Unit kattæ da hiar ki cha Garo Hills wow yaklam neibynta wow yoh u chna lang ya ka EC.
