Jowai : Ka seiñ Jaiñtia Hills Truck Owners Association da pynche ko wa hadien wa yachem ki wa u CEM ka JHADC ha kini ki sngi wa dep da ong ki toh wa pyrchah ki yei khrong dan ki Dolloi.
Ynne ka sngi neiliang ka seiñ da ong ki wa hadien wa da puræ bniah ya ka hukum ka Supreme Court da ong ki wa da sñiawthooh bniah ki ya kani ka hukum wei ym em de u yieñ ki ha ka nongrim wa lada ym pu dep ka JHADC u chna ya ki kyndon aiñ wow khrong ki Dolloi toh u pynsangeh chwa i khrong ki Dolloi.
Ka seiñ leh da pynche ko wa ka Supreme Court na ki por cha ki por da pynmih ko boon ki hukum wei wow pynkhreh kam ya ki hukum yong ka ym emkaam u yang ya ki kyndon thymme wow chna heiwa yatoh wa ki hukum yong ka.
Da ong leh chisien wa da yoh ya ka mynjur na u lat ya ka aiñ ym toh wa emkaam u yang ya ki kyndon pynkrehkaam ya ka aiñ wei heijooh i por leh da em ka mukotduma ha Supreme Court wa yatoh wa ka jylla Meghalaya ha u snem 2009 wa yasriem wa kawa jia ya ki Dolloi.
Da ong chooh wa ki Dolloi da leh ki katkam wa da kdaw ha ka 6th Schedule ka Constitution ka ri-India.
Da pynkut deiwa ong wa emkaam noh u em i ya sñiawthooh yumut ha pyrdi ka JHADC wa ki Dolloi wei wow em i yasuk ha pyrdi ki arliang yow em leh i chaniah ki paidbah ya ka council wa ya ki Dolloi.
Kani toh katkam ka khubor wa da pyllait da u President ka seiñ u N. Chullet
Discussion about this post