Ka Khasi Students’ Union (KSU) Narpuh Circle da rai ko u lai chakhmat wow ujor cha ka National Green Tribunal (NGT) hajrong i pteiñ wow pyntngit yaka wah Lukha neibhah wada kylla rong suiñbneiñ (Blue) biang ko wei ki dakha leh da yap da ki hajar tylli hadooh waki paidbah leh da ya tooid ki cha ka wah Lukha yow ya jied wei tong dakha.
Ini i kylla rong Blue ka wah Lukha da jia ko haka 23 tarik uni u bnai, dang du hadien wa pynmih ka khubor wa kmen ka KSU Sonapyrdi Unit hajrong i sdang yirngam biang ka wah Lukha wei sdang boon dakha biang ha kani ka wah. Tangwa syndet syndet kani ka wah da kylla rong ko wei da yap leh boon ki dakha.
Kam u pynkynmo wa i kylla rong Blue kani ka wah da jia ko nadooh u bnai Thohlakhmi (Feb) 2007, wei nadooh utai u snem pteiñ i kylla rong hadooh katni.
Ka seiñ da pyrchang ko u thooh boon ki laad wow ujor cha ki bor synchar District, MSPCB, Ministry of Environment & Forest wot chadooh u Dr. D.D Lapang hei por wa dang ksoh u kam u Montri Rangbah ka sorkar jylla wei kamjooh cha u Prestone Tynsong heipor wa dang ksoh u kam u montri ka chnat Forest.
Ha u snem 2012 ka seiñ da dawa ko na ki bor synchaar District East Jaiñtia Hills wow dawa yei takit wa laitlooid (Independent Inquiry), tangwa wym leh ki. Neibhah kamwa chynna yosar ka sorkar jylla wym em leh ko iyi iyi. Kamtæ wym emkaam de wow pynlut por wow ujor cha kitai ki chnat sorkar, ka KSU da rai syndon ko wow ujor cha ka NGT.
Kani toh katkam ka kyrwoh wada phah da u Sanatomba Bamon, General Secretary KSU Narpuh Circle.
Ki dur toh kiwa chon haka 24-04-2020.
Discussion about this post