Ynne hadien wa ka BJP da pynbna ko ya ki kular Election (Manifesto) heiwa kawi na ki kular toh wow booh da ka Special Task Force yow takit ya ki kaam baamtooh ka wow khlieh da u Judge wa da chongngiah ka Supreme Court, neiliang ka Congress da ong ko wa ini toh i klamke donhi wow takit ya ya kitu kiwa da emlang hapoh ka sorkar MDA.
Da kylli wa ha kini ki 5 snem ka BJP cheiwon em ko wei katni won da sñiawthooh ko wym jop iwi leh ha Meghalaya kamtæ da pynmih da kani ka kular kawa man leh ka maham ya kiwi ki Party khian wow kohngooh ki lym kamtæ daw cha takit ki.
Da kdaw leh wa u AL Hek wa u Sanbor Shullai toh kiwa embynta hapoh ka sorkar MDA kamtæ daw takit ko ya kini leh ma-ai?
Chooh chooh da ong wa lada ka BJP pynbaad ko wa baamtooh kani ka sorkar, itæ mut wa da pynbaad ko ya idæ hi.
Kamtæ da ong wa ka Manifesto toh du i ktien donhi ka wym em iwa sakhiat iwa ye u pynkrehkaam.
Da ong leh wa ka BJP toh kawa maa bha ya ki bru ka Meghalaya lada pait ya iyi jia ha kiwi ki jylla neibhah ka BJP ngait ko ya kawi donhi ka India nadooh ka dustur, u thylliej kamjooh leh ka niam.
Da kdaw leh wa da dep wow booh ya ka mang poisa kawa T. 1810 klur yow wanrah ya ki kaam pynroi neibynta kiwa khian paaid tangwa da pynlut du T. 530 klur donhi iwa mut 70% na ka poisa ym em pynlut.
Da pynbaad leh wa i pynkylla ya ka Sixth Schedule hapoh ka 125th Constitution Amendment Bill 2021 (Sixth Schedule Amendment) iwa ye wow pyndooh yei yada neibynta ki jaitbru ri-loom ka Meghalaya.
Heiyatoh waka TMC da ong wa nadooh wa wan ko hei bor ha Bengal da thombor ki ya kiwa em pyrchah ya ki wei ya ini i jooh daw wanrah hapoh ka jylla wei ya ka Meghalaya daw pynlai na Kolkatta.
Da pynbaad chooh chooh wa ka TMC toh kawa da baamtooh hadooh palat T. 100 klur yow thung kreh ya kiwa sikai skur (Teachers’ Recruitment Scam) heiwa u Montri warim ka chnat puræ puthi, u Partha Chatterjee da em u ha patok nadooh u Naiynñiaw 2022 hadien wa chah kem u ha ka CBI. Da kdaw leh ya ka Saradha Scam, Narada Scam, Rose Valley Chit Fund Scam wa ini i wadep ya ka khayi masi tooh (Cattle Smuggling Scam) heiwa uwi na kiwa yahkhmat ka TMC, u Anubrata Mandal da cha kset patok u.
Ka poisa wa da pynlut ka TMC ha kani ka Election toh ka wym ye pyrkhat de. Neiwon mih kani ka poisa? da kylli ka Congress.
Puræ leh: Nadooh KG hadooh PG i lai puræ dei mynkna, i kreh sorkar 33% neibynta ki kynthai kular ka BJP
