Ha ka sngi wa ar ka Dorbar Mang Tangka ka JHADC kawa man ynne ka sngi, neiliang u MDC ka Shilliang Myntang, u Daeimi Liam da kylli u weileh wa hap thung ya ki MDC ka Liang Synchaar kam ki Chairman wow ryngkat wa ki Executive Member.
Hawa jubab yeini, u CEM ka Council, u Thombor Shiwat da ong u wa da thung ya ki Chairman ki Committee waphær waphær ka JHADC toh wow pyndep yei kaamram yong ki katkam ki hukum (Notification) wa da pynmih nachwa.
Hajrong ini, u Andrew Shullai da kylli u weileh wa thung ya waroh ki MDC ka Liang Synchaar wow ryngkat ki kat ki Executive Member, yeini u Thombor da jubab u deiwa ong wa em ki MDC kiwa jooh man kam ki CEM, ki EM nachwa wei da thung noh ya ki kam ki Chairman wei ini man i kam ka dak i burom iwa da pynphooh nadooh nachwa.
Heiyatoh wa ini u Andrew da kylli u weileh da thung ya ki MDC wa dang thymme leh wow man kam ki EM, yeiwa da jubab u Thombor wa da leh yeini khnang wa ki leh u kreh ki katkam ki EM hi ha ki Committee wa ksoh ki.
Hajrong ini, u MDC ka War Central, u Jamshaphrang Pohtam da kylli u wa hap u su tam ya ki, yeiwa da kubur u Thombor yeitæ wei da pynrap wot u Nehimaia Lamare wa emkaam wow pynphær noh ya ini i rukom krehkaam.
Puræ leh: Da thung ya ki 6 ngut ki MDC kam ki Chairman wa Advisor hapoh ka JHADC
Discussion about this post