U National Vice President ka National People’s Party (NPP), u Prestone Tynsong da ong u wa nadooh wa sdang ya ka sorkar Meghalaya Democratic Alliance (MDA) ha u snem 2018, ka NPP da yakrehlang ko wa ki 5-6 tylli ki Party, tangwa katni da mih ki cha ki Constituency yong ki wow kynchiñ ya ka NPP deiwa ong wa lehbeiñ ko ki wei pynbaad ki kamni kamtai.
Hawa klam ha ka yalang ha Mawlyngot neibynta u kyrtong ka NPP na Mawkynrew, uni u heh ka NPP da ong u wa nadooh u snem 2018, oo wa u Montri Rangbah boonkaam ki wow yarap ya ki wow e yumut ki man-ka-sngi man-ka-janmiet wei ki Party khian kiwa emlang ha ka sorkar hap hikai kammon wot wow soi ya ki File.
U Prestone da beiñ u yei chah pynbaad wa u Prestone wa u Conrad da dai lut ki ya ki thaw ka Meghalaya cha ka Assam, wot hawa da rai lang. Da khyrwait u leh ya ki deiwa ong wa ha Cabinet yohthiah ki wei ym klam ki katwa cha lait won kylla ki bak-la-bak.
Da ong u wa jooh kynmoo u heipor wa mih ki na kamra yong oo wa u Montri Rangbah deiwa ong khublei ‘Sir’ kam phi kiwa yahkhmat ymyoh de, tangwa katni won u Prestone wa u Conrad toh kiwa sih.
Ha kani ka yalang paidbah da yoh leh i klam na u kyrtong ka NPP, u Kansing Lynshiang uwa da paan kyrchaan na ki paidbah wei ha kani ka sngi da pynyoo leh yei boon paaid heiwa da ki spah tylli ki kari wa da ki hajar ngut ki paidbah da tooid ki cha kani ka yalang.
