Ynne ka sngi, ka Dorbar Chnong Madankynsaw-Mowkyndeng da pynman ko ya i leh burom wow kynmoo kyrpang ya ki waheh kiwa da seiñ ya ka chnong nadooh u snem 1892.
Kini ki waheh kynthup ki ya u Ioanis Iawai Shadap, Jacob Syngkon, Rishot Synnah, Oni Khlem, Babu Cyril Chympa, Edwin Synnah wa kiwi tawon ki waheh.
Ya ini i leh burom da pynman ha u Mot Waheh heipor 8:30 i step hei emlang u MDC u R. Syngkon, u waheh chnong u Danny Shadap ki dkhot ka EC chnong wa kiwi kiwi.
Da sdang ya ka yalang da i duwai wa yah da ka dhab duwai yong ka chnong wa u Babu Stalbinus Dkhar Secretary ka PPC yeiwa da pynbood sa i booh syntu kamjooh i siat suloi wow burom ya kini ki waheh.
U Syngkon hawa e yei klam da yaroh u ya u waheh chnong wa ya ki dkhot ka chnong kiwa da ye u pynlai bait pynlai ryntih ya ki kaam ka chnong khamtam heiyatoh wa i yakhun pyrchah ya ka khlam heiwa hadooh kini ki sngi ym em wa chah ktah ha ka hapoh ka chnong.
Da ong u leh wa ki para chnong para thaw toh u yakreh lang ki chirup chirup wa kiwa pynlai chnong khnang wa ka chnong ka thaw u poi ko cha ka thong wa da angnood ko.
Ka Seiñ Manbei yong ka chnong da pynkup burom ko leh ya u Asst. Secy. ka chnong u B. Rimanki Chympa kam u bru uwa kreh chitom bha ha ka chnong ha u snem 2020 (Man of the Year).
Neiliang u Waheh Chnong ha ki kyntien pynkut da booh u ya ki kyntien kyrpaad na u Blai Kynrad wa uni u snem 2021 u wanrah u yei bha hapoh ka chnong ka thaw nadooh ki waheh ki wow pynbiang ka yung ka sem, ki wow kyntu kynrong ya ka chnong ka thaw wa kamjooh leh ki wow chakri ya ka imlang sahlang.
