15 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1

Pynbna ka sorkar pyrdi sa chisien yaka Nagaland kam ka ‘Disturbed Area’

Advertisement ad1

Ka sorkar pyrdi sa chisien da pynbna biang ko yaka Nagaland kam ka ‘Disturbed Area’ i wow neh sa 6 bnai. Haka 01-07-20 da pynbna ko ya waroh kawi ka jylla kam ka ‘Disturbed Area’ sa 6 bnai hadooh wa kut u Kmaichonglad, 2020.

Ini i pynbna wa pynmih da ka Union Ministry of Home Affairs da ong wa waroh ka Nagaland toh kawa thut kawa maa wei dang emkaam wow em ki chipai yow yarap yaka jylla, kamtæ hapoh ka Section 3 ka Armed Forces (Special Powers) Act, 1958 (No. 28 of 1958), ka sorkar pyrdi da pynbna ko yaka waroh kawi ka jylla kam ka ‘Disturbed Area’ sa chi 6 bnai nadooh December 30, 2020.

Hadien wa pynman aiñ yaka Disturbed Areas Act ha ka 11-09-1958, da pynkrehkaam yaka ha waroh kawi ka Naga Hills, kawa jooh man kam chibynta ka Assam.

Deiwa sahkut i yaklam yasuk ha Nagaland, ka sorkar pyrdi ym pu bien ko wow kheiñstiñ wei da pteiñ ko wow pynkrehkaam yaka AFSPA.

Iwi na i pyrchah ka NSCN (I-M) toh i pteiñ ka sorkar wow kdong ya ki dkhot ki seiñ kieñ suloi heiwa ka sorkar dang pteiñ ko wow pynsangeh ya ki kaam pyrchah aiñ wa leh da ki sieñ kieñ suloi wei da kem leh ya kiwa boon ki heh yong ki.

Ha kani ka tayaw, ka National Investigation Agency (NIA) da e ko yaka Charge Sheet hakhmat ka NIA Special Court, Nagaland, Dimapur, pyrchah ya ki 5 ngut ki dkhot ka NSCN (I-M).

Ka takit ka NIA da chem ko ya i rukom dawa poisa ka NSCN (IM) iwa kynthup leh deiwa maham ya kiwa boon ki Company wa embynta hei chna sarok ha Manipur. Deiwa ong wa ka poisa wa da booh wow wanrah yei roi i paar da pynlai yaka cha ka NSCN (IM) deiwa dawa poisa.

Ka takit da chem ko leh wa ka NSCN (IM) da pynemkaam ko ya kani ka poisa wow leh ya kiwa boon ki kaam hadooh wow thied thaw thied yung.

Share this:
Previous

Thang ka BSF ya i thaw rep bhang

Next

Kynmoo burom ka Madankynsaw-Mowkyndeng ya ki waheh wa seiñ ya ka chnong