Ka National Investigation Agency (NIA) ynnin ka sngi da wan ko wow pynman yei kynreh ha kylleiñ ki thaw ka jylla Meghalaya wa Tripura kam chibynta i lait kynreh wa da pynman ha kylleiñ ka ri.
Ha Meghalaya ka NIA da lai kynreh ko ha ki bynta yong ka South Garo Hills District, hadien wa mih pyrthai wa sooh buit ka Al-Qaida wow leh ki kaam wa maa ha India deiwa emkti ki bru wa psiah pyrchah aiñ na Bangladesh.
Hawa kylli hajrong ini i kynreh, u Montri Rangbah ka jylla Meghalaya, u Conrad K Sangma da ong u wa katkam wa tip u, i kynreh da man ko ha kiwi ki jylla leh, wei ka takit man ko kawa da leh heiyatoh wa i pdung Bomb ha Red Fort, Delhi.
Neiliang u Conrad da ong u wa ym ye wow klam ware hajrong ini i takit ka NIA neibhah man ko ka kaam wa chit wei kawa yatoh wa ka ‘National Security’. Da ong u leh wa neiliang ka sorkar da e ko yei ya krehlang wa ka NIA katwa ye neibynta ka ‘National Security’.
Katkam ka tyllong khubor, ka NIA da lai kynreh ko ya ki yung yong ki bru wa da suba ha ki 10 tylli ki thaw ha ki san tylli ki jylla wa kynthup ha Meghalaya, West Bengal, Tripura, Haryana wa Gujarat. Ka NIA da yoh ko leh wow kem ya ki kor Digital Device wa ki kot ki sla wa kongsan ha ini i kynreh wei da phah ya ki wow takit Forensic.
Hei takit ka NIA wa rap nachwa ha u snem 2023 da chem wa em soo ngut ki Bangladeshi kiwa da psiah cha India da ki kot wa chna thok wei kini ki bru da chem toh kiwa emkti wa ki Al-Qaida.
Discussion about this post