Ka seiñ Jowai Shillong Tourist Cab Association, (JSTCA) ynne i janmiet da pynman ko yei kynreh wa syndet ya ki kari kamai na Jowai-Shillong ha Yingkieñ Myntdu wow pyntikna wa ym em ki kari kiwa kit palat pood (Over Capacity) katkam ka hukum ka sorkar wa ki rai ka seiñ kam chibynta yong i yada na ka khlam u COVID-19.
Ha ini i kynreh da yahkhmat da u President ka seiñ, u Anthony Pohshna; Secretary u J. Lyngdoh wa kiwi ki dkhot ka seiñ wei ini i kynreh toh du neibynta ki kari kiwa em hapoh ka lama ka seiñ ya kiwa jooh pynyieñ kari ha Indica Stand namo ka Jowai Police Point.
Hawa yaklam wa u Anthony, da ong u wa i daw wa pynman ya ini i kynreh wa syndet toh hadien wa yoh ka seiñ chiboon ki ujor na ki paidbah heiwa heipor janmiet ki kari kamai kit ki palat ya i pood wa da booh iwa 3 ngut (4 ngut wa uwa yaah).
Da pyntip u leh wa kiwon kiwon ki kari kamai kiwa em hapoh ka seiñ kiwa dang pteiñ u tyngkheiñ ya kani ka hukum wa i dor wa da booh iwa T. 300 samen ye ki wow chah pynchitom heiwa daw chah phah sangeh kamai ya ki hadooh kamwa 2 tayaw.
Da kyntu u leh ya ki paidbah wa lada chem ki wa kiwa yah kiwa kit ki palat ya ki kyndon wa da booh ye ki wow phone ha ki Number u President-8415849871 wa u Secretary- 7085487463, khnang wow ye u pynchitom ya ki.
Ynne i janmiet ya ki kari wa kit palat pood da phah ya ki bru wow su ki mar chiteiñ ka bai kari kam ka dak wow pynchitom ya ki wei neini i pynchitom won daw man i iwa rap khor.
Heiyatoh wa ini i leh ka seiñ ynne, u Anthony da pyntip u leh wa ka seiñ daw pteiñ ko wow pynman ya i kynreh wa syndet neini chaphrang neibynta i bha i miat ki paidbah waroh.
