Hanla u MLA ka Mawsynram u HM Shangpliang da mih u na ka Congress wow psiah cha ka TMC tangwa ka Congress ym em dooh mynsien næ khylliap lama ko kamwa da paaw wei toh du ki kattu katni kiwa bood yong u MLA kiwa da mih, da ong u PN Syiem uwa man u Working President ka MPCC.
Ynnin ka sngi, kiwa yahkhmat ka Congress ha Meghalaya wa kynthup ya u PN Syiem wa ka Ampareen Lyngdoh kiwa man ki Working President ka MPCC, da hiar ki cha Mawsynram wow ya emlang ha ka yalang yong ka Mawsynram Block Congress Committee, heiwa ka yalang man ko kawa chongchit da i wan paidbah kiwa mihkhmat na ki Unit wa ki chnong waphær waphær hapoh ka Mawsynram Constituency.
Ya kani ka yalang da pynlai da u GS Hynniewta uwa man leh u President yong ka Mawsynram Block Congress Committee wa u SH Kharbani uwa man u General Secretary yong ka MBCC uwa da e yei klam pdiang ya waroh ki paidbah kiwa da wan cha ka yalang.
Ha kani ka yalang da yoh leh wow pyntipmit ya kiwa kitkaam yong ka MBCC, ka Mawsynram Mahila Congress Committee wa ka Mawsynram Assembly Unit Congress Committee.
U Maxwell Lyngkhoi uwa man u Vice President yong ka MBCC, kamjooh leh uwa kyrchaan wa rangbah yong u HM Shangpliang, hawa e yei klam da ong u wa i mih u HM Shangpliang na ka Congress khlem da pyntip ya kiwa kyrchaan man ko thij kam u pa wa lai thooh beinah u wym jooh nood wow khana ya ka bei wa ki khon wei ini man ko wa da mih u samen wa kattu katni ngut kitæ kiwa kam ya idæ wa ki toh kiwa bood hakhmat wei i leh mylliñ yong oo da pynchrai ko ya kiwa kyrchaan.
Da ong u leh wa kam kiwa kyrchaan ym em poi pyrkhat ki wa u HM Shangpliang uwa man u du kam uwa bood yong u Dr. Mukul Sangma ym uwa yahkhmat, da long u wa thij kam ka Trailer Jeep wa kattu katni ngut kiwa bood ya oo toh du kiwa chong Trailer tangwa kiwa kyrchaan yong ka Congress, ym toh kiwa chong Trailer tangwa daw chong skem wei kyrchaan ki ya u kyrtong ka Congress ha ka Election kawa daw man ha u snem 2023.
U PN Syiem da pyntip u wa ka MPCC da thung ko ya u GS Hynniewta ha ka 1 tarik uni u bnai katwa u HM Shangpliang dang khut yalang wow khylliap lama ha ka 8 tarik, wei ini waroh man ko du i leh kutlaad khlem pynchong yurim de.
Da ong u wa hei yongsakhiat ym ye wow khut ya ka yalang neibhah ym em de man u kam u President yong ka BCC, wei kamtæ u PN Syiem da khut u ya waroh ki paidbah wow ya kreh chitom wow pynkhlan ya ka seiñ khnang wow wanrah yei jop ha ka Election wow wan.
Ka Ampareen hawa e yei klam da pynsñiaw ko yei sñiawngooh ya waroh ki paidbah kiwa da wan cha ka yalang wei da ong leh, neibhah wa u Shangpliang khlem da yoh bor u na ki paidbah wa kyrchaan, samen samen wa ki kattu katni kiwa bood da khylliap lama ki khlem yurim, kamtæ u PN Syiem wa u GS Hynniewta da kaweh ki ya ka lama kam i dak wow pynyoo cha ka pyrthai wa ki paidbah wa kyrchaan ka Congress ym em khylliap lama tangwa dang kaweh hi ki ya ka lama.
Da pyntip ko leh wa i synchaar yong ka NDA ha Delhi wa MDA ha Meghalaya, da man sakhiat i jynjar wa i saja ya ki paidbah wa chong chnong neidaw wa ku dor ki marbaam wa kiwi kiwi khamtam dooh wym ye ka sorkar MDA wow chakri ya u paidbah ha i por COVID-19.
Ha kani ka sngi da yoh leh i klam na u C. Syiemlieh uwa man u President ka Assembly Youth Congress wei da yoh i e khublei na u GS Hynniewta.
